股神捐身家獲總統勳章
美國總統奧巴馬，尋日喺白宮向15位「總統自由勳章」（Medal of Freedom）得主授勳，向來熱心慈善事業嘅股神巴菲特，就係其中一位得獎者。
「總統自由勳章」係美國最高平民榮譽之一，旨在表揚一啲對美國或世界和平作出重要貢獻嘅人，而奧巴馬向巴菲特「加冕」時就向對方「笠高帽」，讚揚巴菲特唔止係全球最富有嘅人，仲係全球其中一位最值得尊重嘅慈善家，願意承諾死後捐出大部分身家。
奧巴馬送領呔畀股神
奧巴馬講笑咁話，由於巴菲特實在太過節儉，唔會點買新領呔，所以喺巴菲特上次到訪白宮嘅時候，忍唔住送咗一條新領呔畀佢，仲話蓋茨下次再嚟白宮嘅時候，可能都會想要一條喎。
股神巴菲特（前）獲美國總統奧巴馬授勳。(美聯社圖片)