恒生高層利是派足幾日
踏入兔年好多中小企都開工大吉,銀行就不停咁同客拜年,好似滙豐銀行同恒生銀行(00011)都大搞呢啲應節活動,兩家銀行嘅巨頭親自見吓班客仔。
恒生由副董事長兼行政總裁梁高美懿帶隊,連同企業及商業銀行業務主管陳力生、商業銀行業務總監林燕勝(Donald)同新上任嘅商務理財業務總監左玫(Rose),喺十五同十六日向大家團拜。太子收到風,Rose今個月啱啱履新,一樣大派利是,聽聞上星期親自落晒恒生全部商務理財中心,向超過200幾個商務理財業務同事派利是,淨係派利是都派足幾日,至於Donald,聽講佢派畀自己部門同事,都派咗600幾封。
歐智華酒會見大客
滙豐尋日亦喺總行3樓搞咗一個新春酒會,年初正式上任嘅滙控(00005)行政總裁歐智華同埋滙豐亞太區行政總裁王冬勝負責主持酒會。
酒會六點半開始,嘉賓魚貫入場,包括新世界(00017)主席鄭裕彤同埋阿仔鄭家純、新地(00016)副主席郭炳江、中建集團老細許世勳、許晉亨等。
恒生新春團拜,副董事長兼行政總裁梁高美懿(中)向客戶拜年。