股海實戰：光大控股落定注等業績

內地公布一月份通脹數據，雖然CPI增幅比外界預期為低，但投資者將偏差歸咎於當局調整了統計方法，將食品支出所佔比重下降。究竟統計方法經「調整」後嘅CPI數字，能否確切反映大眾嘅生活水平，倒值得關注。

正正由於市場對內地通脹憂慮未消，尋日滬綜指衝高後回吐，報2,899點，僅升0.1點。港股前日反彈過後，尋日再現疲態，低開後反覆回落，恒指更失守23,000點，埋單報22,899點，唔見221點，大市成交進一步縮減至677億元，走勢差劣，睇嚟下周五即月期指結算，淡友呢鋪真係要贏到盡！

個股方面，尋日見報提及嘅金隅股份（02009）一度衝上11.2元，收報10.7元，升3.68%。此外，中國國航（00753）宣布今年一月份營運數字，本地旅客周轉量按年增幅13.2%，數字持續有改善。不過，其股價未見受惠，曾低見7.7元，收報7.76元，跌2.88%，成交1.29億元。睇番投行報告，普遍認為國航一月份營運數據符合預期。

市況好個股估值高一高都叫吸引，市況淡股價大幅下調估值都係嫌貴，呢條係股市定律！純睇走勢，上周低位7.28元不容有失，否則要繼續尋底；但論基本因素，阿莊未對國航前景感悲觀，特別係內地近期公布嘅經濟數據顯示，進出口增長理想，顯示內需依然強勁，人民幣升值速度或會加快，國航貴為內地航空業龍頭，實毋須過於睇淡，且密切留意低位承接。

港股走勢疲弱，股價逆市走強者，倒不簡單，尋日就見到光大控股（00165）股價靠穩，高位曾見16.94元，收報16.52元，升0.86%，成交1.84億元。阿莊隻順風耳聽聞，近日公司先後與傳媒及投行進行新春聚會。消息指去年公司經營成績唔錯，個別部門員工多收差唔多成年人工作為花紅，真係笑到見牙唔見眼。咁講法，相信下個月廿九日公布嘅末期業績會報佳音！

成功轉型有「錢」途

事實上，光控分拆光證及光銀上市計劃經已實現，去年十二月，其持股33.33%嘅A股光證實現純利2.6億元人民幣，按月穩中有增；而旗下聯營A股光銀去年實現純利126億元人民幣，按年增長達66%，相信集團來自這兩項投資嘅收益不俗。

更重要嘅係，近年光控已成功轉型，透過建立直接投資業務，為整體業務的長遠增長前景打下良好基礎。據了解，目前集團旗下直接投資業務已管理七個投資基金，所管理嘅資產公允值達到一百億元。另外，去年末季，集團將光大證券（國際）51%股權售予光證，相信經是次整合過後，可理順關係，彰顯兩地證券業務嘅協同效益，更有利捕捉QFII商機，為集團近年積極構建嘅資產管理平台服務。

睇番光控嘅股價，去年末季以來受累於A股市場嘅利淡氣氛，由高位22.55元回落，插穿去年十月嘅配股價18元，上周低見15.4元始回穩，累計跌幅超過三成，估值已回落至吸引嘅水平。考慮到技術上滬綜指亦已重上250天線，兩會前A股市場頗大機會持續靠穩，加上光控業績可予憧憬，故阿莊擬落場先下首注，估計其合理值喺20元樓上，止蝕位定喺14.5元。

戰報

菱控（08009）

May於本周一推介嘅菱控連日做好，尋日高見0.046元，較推介時低位0.041元，升逾12%。

昂納光通信（00877）

昂納光通信尋日逆市飆升，最高升抵5.24元，較錢進上月二十八日推介低位4.6元，升近14%。