滙控墟冚業績會變回憶?
全城擁有超多股東嘅滙控(00005)將喺本月底(二十八日)公布全年業績,今次將會由新任集團主席范智廉以及行政總裁歐智華首次以新title主持。不過,唔知係咪新人事新作風,由今次業績會起,滙控將會用視像廣播,不再設記者招待會,以後各位記者朋友就變咗坐定定喺office「睇直播」。
國際趨勢網上直播
滙控話,轉用視像廣播係為咗確保全球各地媒體都有機會參與,到時滙控管理層會齊集倫敦,主席、行政總裁同埋集團財務董事麥榮恩主持業績會,到八月中期業績,管理層才再現香港。
滙控發言人話,國際大型銀行如摩通、高盛、花旗、美銀等銀行業績會已經以視像廣播形式進行,佢哋都係配合國際趨勢咁話。
太子認為,記者以往排住隊等拎業績報告嘅墟冚情況不復再,接近全場舉手問問題嘅情景都會成為集體回憶,依家演變成全球記者參加電話會議兼夾網上睇直播,唔知到時會否造成網絡大塞車呢?
至於另一國際大行渣打(02888)又點呢?據太子了解,至少即將公布嘅全年業績會有記招。滙控旗下嘅恒生(00011)就好似暫時照樣有記招,最終以正式公布為準。
滙控業績將會轉用視像廣播。(資料圖片)