Fundman睇市：東風銷量勁芬佬補貨忙

埃及變天，中東局勢暫告平穩，配合A股愈升愈有，港股延續上周五低位反彈之勢頭，尋日再升292點或者1.28%，報收23,121點，主板總成交得番781億元，升市成交跌並非太好兆頭，鑑於今日中國公布通脹數據，明顯睇到基金經理無內地股民咁勇。

滬綜指強勢，差1點重返2,900點關口，要多得內地公布的一月份進出口數字有出人意表發展，分析員估計出口增長會由去年十二月的17.9%回升到22.5%，結果見37.7%，比分析員估計足足多六成七；進口預測同樣誇張，本來估計由十二月的25.6%升幅，擴大到27%，結果係51%，創咗半年新高，貿易順差由131億美元收窄到64.6億美元。數據公布後，人民幣兌美元輕微回順，順差的收窄，估計短期炒人民幣升值的預期，會稍為收斂。

由進出口數據可見，大行預測未必十足十，千呼萬喚的通脹數字，今日會唔會又有意外驚喜？史提芬睇番彭博資訊統計數字，預測的平均數係5.4%（去年十一月5.1%、十二月回落到4.6%），最高與最低預測係6.6%及4.8%。筆者估計，港股近期已把通脹繼續攀升的可能性反映得七七八八，如果出來數字係5.2至5.4%，對大市影響中性，如果低於5.2%，恒指收復上星期失地的機會唔細，短期目標可以睇23,440至23,625點。然而，通脹仍有機會在未來幾個月，進一步逼近○八年初高位紀錄8.7%，通脹預期亦會限制每次大市反彈的幅度。

補貼取消未見影響

分析員唔係神仙，估錯常有，好似一月份中央取消對排氣量低於1.6公升的汽車提供補貼，大行估內地汽車銷售至少會靜番一排。估唔到，東風（00489）一月銷售量達20.9萬架，創歷史新高，按年升25.9%，高過市場預測的20%一大截，數字亦比中國一月份乘用車總銷售的21%增長率為高，可見其市場佔有率仍然在上升當中。

從細分數字，東風日產與東風本田等售價及毛利較高的乘用車系，按年錄得25.1%及32.1%增幅，重型貨車更升34.8%，雖然只係一個月的營運數字，未必足以令分析員修訂全年業績預測，但去年第四季開始睇得極淡的基金經理，或有需要入市補番多少倉底，博一博反彈。尋日接近4,500萬股成交，乃係今年最多的一日，成交配合下，短期應可睇高一線。由大行預測，估東風一一年全年賺117.96億元人民幣（較一○年增長不到5%！），預期市盈率九倍，比同業平均的12.3倍低一截，即使回到歷史平均估值11.8倍，潛在上升空間已超過三成。