股海實戰：金隅回歸A股有前途

近期港股急挫，主要係美國利率期貨顯示，市場預期聯儲局喺今年底加息嘅機會大增，加上美國經濟復甦前景有改善，引發資金回流美國市場，近期美股與港股走勢明顯出現背馳，足以說明這一點。

不過，問心嗰句，人人都知道美息無可能長時間咁低迷，有條件加息，即係話美國經濟復甦加快，類似中國等出口國前景將會受惠，理論上對全球經濟復甦係好處多於壞處，只係早前傳統基金過於睇淡美國市場，如今要將部分資金由新興市場重投美國市場。阿莊相信，今次基金減持新興市場資產，並不等於要「撤離」新興市場，而事實上，新興市場基本因素未有明顯變壞，首季港股調整亦不一定係壞事。呢一刻最重要係保留實力，留意市況承接，做好隨時入市低吸優質股票嘅心理準備。

另一點令阿莊覺得，今次港股跌到22,000點水平經已差唔多嘅原因，乃見近日內地股市持續回升，滬綜指尋日一度重上2,900點，相信喺下月初兩會前，社保基金及保險資金開始入市穩定A股市場，以為兩會前夕營造太平盛世嘅良好氣氛有關。從呢個角度出發，若然短期內地市況持續回穩，相信部分淡友會選擇平倉獲利，故見尋日恒指一口氣重上23,000點，並不出奇，只係成交略嫌不足，恒指會否呈雙底回升，就要睇埋呢個禮拜嘅走勢，先至可以下定論。

內地消息指，去年中國南車（01766）地鐵中標金額達到114億元人民幣，佔內地市場份額逾六成，即係話超過對手北車（601299），理論上係好消息，尋日見到好淡爭持相當激烈，股價曾低見9.2元，收報9.52元，跌2.96%，成交增至4.5億元。

查實今次南車股價跌勢較急，在A股市場掛牌嘅北車亦如是，事緣從○三年開始已擔任鐵道部黨組書記嘅劉志軍，因「嚴重違紀」而正接受有關部門調查，掌管行業嘅部門舵手出事，難怪對二車股價帶來震動。

不過，阿莊認為拓展內地鐵路版圖係國家政策，不受部門個人去留左右，加上二車雙頭壟斷行業嘅局面未變，話唔定本輪調整可能係危中有機。

購併太行影響正面

回說尋日異動股，建材板塊走勢甚勇猛，海螺水泥（00914）、中國建材（03323）、華潤水泥（01313）升6至8%不等。提到水泥股方面，金隅股份（02009）以換股方式吸收合併河北太行水泥（600553）股份嘅方案，已獲得北京市商務委員會正式批覆，換言之，金隅合併太行水泥後，將喺A股市場掛牌上市。

今次合併收購，既可解決金隅與太行之間喺水泥業存在嘅競爭問題，而本身兼營房地產開發及物業投資與管理業務嘅金隅，若然靠IPO途徑申請喺A股上市，礙於目前嘅產業調控政策，恐怕遙遙無期，如今變相抄捷徑實現喺A股上市，長遠有助增加多一個融資平台，影響正面。

再睇股價走勢，今浪反彈若未能突破11元關，有機會再回試9.5至9.6元支持區間，可留意走勢，然後候低分注吸納，長遠來說，此股可成大器！

戰報

東風集團（00489）

積奇昨日推介東風集團，受汽車銷售理想帶動下，股價昨日高見14.7元，較低位13.48元勁升逾9%，相當和味。

珠江鋼管（01938）

姚午齊上周四指珠江鋼管股價再次起動，果然不負所望，昨日破位高見4.32元，較推介低位3.85元，升幅逾12%。