恒生張樹槐愛死馬拉松

銀行界馬拉松發燒友名單之中，恒生（00011）助理總經理兼傳訊及企業責任主管張樹槐（Walter）一定上榜。佢話：「我覺得最美就是跑步的時候死去。」就知佢幾咁發燒喇！

話晒新正頭，點解講埋咁唔吉利嘅說話？Walter話人生有好多種死法，可能癌症死、又可能瞓覺死，既然佢咁鍾意跑步，死喺跑道上都叫適得其所。太子上星期先同Walter食晚飯，見到佢身形仍然係好Fit，相信佢嘅馬拉松之路仍然係好漫長。

當初家人朋友知道佢要參加馬拉松，都嚇咗一大跳，皆因佢自小同運動絕緣，中一學校賽跑跑包尾，至今佢嘅最佳成績係三小時四十七分完成馬拉松，有咁大轉變，佢話要多謝一個人同埋神。

啟蒙師傅係同事

呢個人係同事兼師傅楊子江，不但教佢跑步技巧、借參考書，首次跑馬拉松時還專誠到終點等他影相。至於神就唔使多介紹喇，有信仰嘅Walter跑步時習慣默唱詩歌，有時更會高呼「哈利路亞」，感覺與上帝更接近。