股海實戰：中信國際電信短炒波幅

兔年首個交易周港股急挫，恒指最多唔見超過1,400點，最慘大市跌而成交增，兼且外圍升港股照樣跌，可見投資者真係要錢唔要貨。再睇埋新興市場債券基金報價亦全線下滑，反映基金們正全面減持新興市場持倉，究竟沽完未？阿莊都冇水晶球，只係知道如今資金面已發生巨大變化，唔好奢望短期內可復原，即使呢啲位有實力撈貨，都要預咗擺長線。

回說上周五反彈市，恒指回升120點，收報22,828點，大市成交898億元。正所謂「吊頸都要抖抖氣」，亦有可能係部分淡倉嘅平倉盤所帶動，但說到底目前只能看成技術性反彈。不過，技術上若然呢轉上唔番50日線23,400點嘅，再尋底嘅機會甚大。

另一角度睇，資料顯示，喺牛證市場，收回價喺22,000點或樓上嘅恒指牛證尚餘約60隻。上周五恒指低位喺22,446點，與去年十二月所做嘅低位22,392點接近，今鋪雙底回升固然好，否則嘅話淡友可能會殺穿22,000點盡殲牛仔！

上周五大市反彈，藍籌股中以騰訊（00700）反彈幅度較大，高位做198.8元，收報197.3元，升5.28%，成交達到17.8億元，沽空額2.72億元。其次係上周二阿莊提及嘅思捷（00330），高位做40.9元，收報40.4元，升4.26%。基本上，思捷公布中期業績後，大行嘅評價有改善，料股價可反覆靠穩。

唔少近期遭狂質嘅基金股，上周五亦告反彈，雨潤食品（01068）、恒安（01044）、招金礦業（01818）、汽車股華晨（01114）及廣汽（02238）都止跌回升，內房股則繼續探底，中國海外（00688）、華潤置地（01109）股價均創五十二周低位，照計今輪壞消息應該出得差唔多，誠如阿莊上周五所講，又係股海「清兵」發揮功架嘅時候！

事實上，股票市場有買有賣先至有成交，有人沽貨離場，都要有人肯接貨先至走得甩。講開內房股，基金公司VP自上月初披露持有富力地產（02777）逾5%股權後，至今多番入市增持，最新持股量已增至9.02%，過去一個月富力股價累計跌幅最多達16%，呢招人棄我取係咪明智，就要做事後孔明！

憧憬注資陸續有來

上周五，1隻表現較佳嘅股份，乃中信國際電信（01883），全日高位2.62元，收報2.6元，升近7%，成交1,806萬元。去年十二月，該股回落至250日線2.4元便觸發反彈，升抵上月初高位2.78元又再回落，至近周再試250日線承接下，上周五明顯反彈，可以說已兩次成功考驗250日線2.4元水平承接。

中信國際電信專門做三大電訊商嘅生意，受惠三網融合，電訊設備需求保持增長，業務前景穩定，但正正係業務以「穩」為主，股價並非大跌大升之類。去年第三季，股價由低位大彈逾五成，主要係超賣下引發市場重估，加上獲注入虛擬專用網站服務供應商資產後，市場預期日後產業條例許可下，母公司會繼續向其注入通訊資產。

平心而論，股價守穩2.4元樓上，跌市中此股表現可望跑贏大市，但除非有重大利好消息刺激，否則向上2.8元水平阻力非輕，策略宜喺2.4至2.8元水平炒波幅。

戰報

國際精密（00929）

國際精密上周五大幅飆升，高見1.53元，冼金基早於上周二已經吼實，跟佢於當日低位1.35元上車，可賺超過13%。

MI能源（01555）

錢進早於本月一日睇中MI能源，話有力見新高，股份上周五創上市新高2.36元，較推介日低位2.08元，升超過13%。