Fundman睇市：和電香港有條件追落後

估唔到港股小兔只會跳落，唔識跳上，春節假期後短短四日，恒指高低位相差超過1,300點，尋日恒指再跌455點，收報22,708點，最弊係跌市中，成交由初五的657億元升到尋日的976億元，跌市成交不跌反升並非好現象，反映基金經理愈掟愈狠，要錢唔要貨，尤其是國企股，至少恒指仲未失守去年十二月中22,392點的低位（主要多得滙控（00005）），國指尋日收報12,022點，重返去年九月中水平，係五個月低位。

有位外資行老友話，近期市場撤資速度有加快迹象，然而不限於港股，資金由新興市場流出，回到歐美等成熟經濟體股市。港股昨日跌1.97%好似好恐怖，但不妨睇睇亞洲其他股市，從前的四小龍，台股跌1.9%，韓股跌1.8%，新加坡股市都跌1.5%，僅得半封閉的中國A股繼續派對。未計尋日，截至星期三止大摩亞洲股市指數（日本除外），由一月十三日高位跌咗4.7%（相信尋日數字會累積到6%左右），歐美股市指數卻係日日改寫新高，講來講去，基金經理驚美國量化寬鬆，水浸新興市場，通脹失控的風險，不利股市。

以技術走勢，恒指由聖誕前低位22,392點起步升到24,434點掉頭，升浪的0.764，在23,005點，尋日穿埋，意味着十二月至一月中的升浪，可能純粹是十一月初24,988點跌落嚟的一次技術修正，中期跌浪仲未完成。

已屆分段入市時機

經驗告訴我們，人人見到股票掉頭走，往往係入市良機，今日係咪？一一年國企股平均市盈率，已低至10.2倍水平，比過去十年平均13.8倍折讓兩成六。假如中國通脹在第一、二季見頂，到時至買可能太遲，能夠忍受一成至一成五的帳面損失，刻下應該開始分階段入市，動用三分一資金買內銀、內房等嚴重落後的股份，短期輸極有譜。

數碼通（00315）確係奇葩中的奇葩，大跌市下連升三日，股價重返二○○○年中科網泡沫爆破後高位。智能手機普及拉動數據用量，折舊高峰期過去，自由現金流大增，吸引基金追捧，不過數碼通盈利派息率接近百分百，一一年股息回報約2.5至2.6厘，除非相信能夠在有限市場空間成功搶客，否則再追理據不太充分。反之，客量較大的和電香港（00215），昨日股價突破一月高位2.85元，且成交大增，睇番兩者基本條件大致相同，同樣享受財政優勢的改善，以及ARPU見底回升的好處，但後者一一年預期息率卻有近4.5厘，似乎有追落後的條件。

綜合證券界對和電之預測（港元）

10年 11年

年度純利 7.2億 8.28億

每股盈利 14.8仙 17仙

派息 11.2仙 13.3仙