期指攻略：上落市走勢 料持續

港股兔年出閘脫腳，昨期指開高，早市見24,018點後，連試攻24,040點好淡分水嶺也未有，已經全日浸浸落，穿23,654點支持後，跌勢轉急，最後將虎年收爐半日市的升幅，跌番大部分出街，恒指跌355點，報23,553點，期指低水41點，報23,515點。

上星期三挾淡倉，大戶只係用432億元就成功挾高426點，經已預咗市底較虛，只係估唔到，在美股平穩向好，內地股市周三才復市的情況下，港股可以自顧自下跌。年初七A股重開，市場開始賭人行會前後腳加息，昨日期指去到23,540點樓下收市，短期超買的港股，總算回歸到比較中性水平，假如美股昨晚沒太大意外，相信港股今日呈窄幅波動，先在現水平整固的機會較大。

內銀股主導跌勢

筆者一再強調，期指一日唔能夠重返24,040點樓上企穩，中短期大市依然係「上落市」，或者「中期調整未完」二選一，雖然即市做好做淡皆可，但持倉數目一定要好好控制，博反彈只宜以平常倉底三分之一晒士進行。值得留意的是，昨日擔心人行加息，內銀股主導跌勢，幾隻重磅內銀已逼近近期的收市低位，A股復市走勢未敢樂觀，恐怕將影響今日下午，尤其臨收市前的港股表現。要瞎猜，筆者會估今日大市重演尋日先高後低的格局。