Fundman睇市：宏利估值吸引值得揸貨

兔年紅盤低收，跌355點，報23,553點，話昨日跌得誇張，倒不如話上周三，虎年最後的半日市挾得太離譜，尋日港股來個還原基本步，市場開始為人行在A股重開前後，加息四分之一厘的可能，預早來個準備。

展望下周二中國公布一月份CPI數字，在季節性因素影響下，估計會升至6%，最壞打算可能係6.3%左右，人行近期慣咗在CPI曝光前做嘢，純個人猜測，本周五、六加息機會唔細，港股先來個洗牌再嚟過，都未嘗不是好事，至少上星期無重倉過年的，可以趁年初執吓平貨。

假期前A股強勢，反之A股指數基金X安碩A50（02823）溢價有收窄迹象，如果A股代表內地投資者態度，香港的A50反映香港及海外投資者對內地股市看法，兩者可真是南轅北轍，後者悲觀得多，末日博士魯賓尼估中國通過加息，以收緊信貸壓抑通脹的做法，今趟經濟硬着陸機會大增；由內銀股估值處於歷史（雖然上市日子唔長）低位，或多或少見到這風險溢價，早被基金經理所考慮及加在估值模型上，昨日工行（01398）及中行（03988）股價創一一年收市新低，建行（00939）都平咗6.79元的收市低位。短期而言，人行落實加息，反而有機會紓緩市場對將加未加的緊張情緒，內銀股反而有死貓彈的機會，不過中期市況要改善，還看人行能否順利走過平衡市場資金需求，以及控制通脹避免失控的鋼線。

思捷40元樓下可買

咁嘅市況查實無乜好講，唯獨兩隻股份在業績前炒高吸引到筆者，思捷（00330）周四出中期成績，不能不認這確實是筆者去年一大失敗之作，50元水平左右推介，結果愈買愈平，再一次證明基金經理，情願用三、四十倍估值、貴一貴追買增長股，都唔願意用低廉價錢買入無故事、短期業績仲有輕微下滑的弱勢股。

瑞銀在上月曾將思捷目標價由49元降至45元，但強調主要因歐洲零售商對短期市道審慎所致。其實，由歐洲其他競爭對手接單情況同樣未算出色所見，相信係市道問題，而非管理或品牌出問題。

思捷在○八年金融海嘯前，年賺64.5億元，之後跌至47.4億元及42.2億元，從有限的市場預測中，今年上、下半年分別賺23.6億元及15.4億元，全年賺39億元，再跌7.5%左右，PE12.8倍。思捷其實做咗唔少對長遠前景有益嘅事，例如重金搵咗H&M前品牌總監及幾個負責創作嘅管理層，重整產品設計及形象，亦已回購中國業務，可惜這都不是三幾個月見到效果的舉動，在追求速食文化的投資市場唔夠噱頭，但悲觀的估值已反映一切，40元樓下應該風險有限。

加息周期有助業績

宏利（00945）尋日升逾5%去到大半年高位，公司同樣在周四公布全年業績。

去年股市回落，利率向下，上半年宏利已蝕12.78億加元，到第三季核心業務復甦，可惜美國商譽撥備及20億加元的增補撥備，再多蝕9.47億加元，但觀乎分析員預測全年業績依然在水平線樓上，賺1.47億加元，可見環球股市第四季的反彈加上部分地區開始進入加息周期，對宏利業績幫助極大，至少非現金虧損撥備會有大幅回撥。

過去兩年股市表現加上超低息口，對保險公司的傷害不言而喻，隨着各項因素逐漸消失，料宏利業績今年開始重返正軌，預期市盈率12.3倍，處金融海嘯前12至16倍的中下限，筆者未知業績會否有驚喜，但目前估值明顯未算高，不妨繼續揸住。