股海實戰：思捷憧憬佳績炒定先

港股尋日如期紅盤高開，不過未夠動力衝穿24,000點關，之後掉頭回落，全日低位23,530點，收報23,553點，跌355點，大市成交縮減至657億元。其實阿莊認為，埃及局勢並不直接影響港股表現，反而今年內地經濟發展前景尚未清晰，先至係投資者最大嘅憂慮。且觀察本周三內地A股復市，能否為後市走勢提供更多指引。

指數偏軟，藍籌股中，油股受壓，僅滙控（00005）、恒生（00011）、國泰航空（00293）以及思捷（00330）股價得以高收，升幅介乎0.2至2.9%。阿莊相信，今年滙控有機會實現喺上海國際板掛牌嘅計劃，重納「紅底股」之列只係時間問題，兔年首個交易日開個好彩頭，希望能為多年捧場嘅股東們帶來豐盛收穫。

至於尋日提及嘅騰訊（00700），一度飆上212元，之後隨大市反覆回落，收報203.2元，跌2.5%，成交12.3億元，三月十六日公布業績前股價可能仍有反覆，正所謂「一年之計在於春」，要好好把握春耕播種嘅機會！

除咗大價股之外，阿莊尋日先至講完，今年可以繼續捧超人場，繼長實（00001）及和黃（00013）喺年三十半日市大發神威後，尋日與超人有關嘅二、三線股：長江生命（00775）、鉑陽太陽能（00566）及TOM集團（02383）逆市上揚，升幅介乎6.3至8.2%，順勢追落後可留意中聚雷天（00729）。

一年一度嘅「兩會」會期又再臨近，據中國全國人大常委會辦公廳和全國政協辦公廳近日宣布，人大及政協會議將分別在三月五日及三月三日喺北京開幕。由於今年係「十二五」規劃嘅開局之年，故外界特別重視今次「兩會」會議，相信會議內容將對未來五年嘅政治接班安排及經濟規劃和發展提供更清晰嘅方向。

新興產業商機無限

阿莊始終認為，若然針對國策，今年上半年內地經濟主力要控制通脹，內房及內銀股都可以唔使點睇，內需股估值亦要打個折，反而新興產業將提供更大商機，選股不妨多圍繞環保、節能、文化及三網融合等產業出發。講到新興文化產業，消息指官方背景嘅人民網計劃喺上海證券交易所掛牌，成功嘅話將成為首家喺本土上市嘅新聞網站。

回說尋日4隻喜迎「開門紅」藍籌之一嘅思捷，將於本周四公布截至去年底止中期業績。由於期間歐洲批發業務不濟以及歐元兌美元匯價下跌，坊間預期半年盈利介乎20億至26億元，同比變幅介乎升3%至跌25%不等，但整體而言仍有所改善。若然嚟緊公布嘅中期業績對辦，有望引發市場重估，若股價能成功以大成交突破40元關，走勢將會煥然一新，惟向下36元支持不容有失。

戰報

中國木業（00269）

志強過年前吼中隻中國木業，尋日逆市展強勢，高見0.52元，以推介日低位0.465元計，兩日間累升近12%。

東岳（00189）

姚午齊上周二已經介紹東岳畀大家，股份由當日4.18元，升至昨日的高位4.78元，跟佢買貨，幾日就賺超過14%。