盧韋柏帶埋財神開工
經過幾日春節假期，尋日好多人開始返工，打工仔梗係想收番封利是，等新正頭可以攞番個好意頭。花旗香港環球及個人銀行服務行政總裁及總經理盧韋柏（洋名Weber）就識做啦，一早起身，銀行未開門，就去到旺角旗艦店同員工拜個早年。
落區派開工利是
話晒旺角分行都係旗艦店，除咗基本櫃台服務，仲設有花旗私人客戶服務中心，以及Citigold中心，咁就肯定人多勢眾，所以Weber好醒咁帶埋「財神」去，由「財神」負責派金幣朱古力，自己就派開工利是，等啲員工可以財源廣進，業績節節上升，個個賺到盆滿缽滿。聽聞Weber仲好落力咁逐層逐層同每個員工祝賀。有咁嘅老細，員工自然落力啲做嘢。
至於「財神」呢，佢仲好頻撲咁趕去鰂魚涌太古坊後勤辦公室，逐層向員工拜年，當然唔少得朱古力金幣。太子估唔到佢一早起身，仲可以有氣有力行九層樓拜年，「財神」果然係「神」，唔會累。
花旗盧韋柏（右一）帶埋財神向部門員工大派利是。