冼博德伉儷拒絕奢華

聽聞今年銀行大班花紅好和味，少則4,000萬，多則億億聲，唔怪得佢哋嘅另一半，生活媲美嗰班乜太物太，住得豪、着要靚，閒時就要行街Shopping，專買著名設計師嘅靚衫，度假就坐郵輪去加勒比海，但凡事有例外，渣打（02888）CEO冼博德嘅太太就好另類，一啲都唔想過奢華生活，教導子女亦一樣。

堅持送仔讀公立學校

冼博德嘅太太Besty Tobin係美籍，嚟自美國俄亥俄州。佢嘅思維同一般賓架太太好唔同，簡單講就係反傳統。唔知同佢係小說家身份有冇關係，教仔嘅方法都與別不同。聽聞，之前佢個仔畀人打劫咗好多次，但仍然堅持送個仔去公立學校讀書，原因係佢想個仔可以融入世界，唔好淨係與富豪第二代混熟。

佢哋兩公婆都有共識，唔會揀喺倫敦嘅貴價地段居住，只要住嘅地區企企理理就可以。冼博德之前試過大拿拿捐咗300萬花紅去慈善團體，都估到佢哋唔係咁着重物質生活。

英國嘅報章形容佢哋厭惡放縱，所以唔理世俗眼光，以身作則無做大花筒。好多闊太去加勒比海度假，佢哋就兩公婆帶埋四個仔女，來個本地自駕遊，仲好有益身心咁徒步旅行。