股海實戰：騰訊步步高陞福氣旺

兔年伊始，阿莊恭祝各位身體健康，萬事勝意，股海實戰出入平安，旗開得勝！

港股今日新春長假後復市，由於月初美股道指升穿12,000點關後，未見有太大回吐，一直企穩其上，加上長假前未見人行有加息行動，而今日內地A股尚在休市，相信港股可順勢紅盤高開高收，為兔年股市開個好彩頭！

美股上周五持續高企，全周計創兩個月以來最大單周升幅，主要係受企業業績表現理想提振，雖然一月份非農業就業數據遜於市場預期，但市場傾向接受歸因於暴風雪天氣所影響，亦顯示聯儲局短期不大可能會縮減刺激經濟計劃嘅規模，故未有太大反應，一於繼續坐順風車！

藍籌股中，虎年長實（00001）及和黃（00013）可以話係威到盡，年三十半日市，長實及和黃分別升逾5%，就連同系嘅TOM集團（02383）亦升逾7%，旺氣十足。踏入兔年，可以繼續捧超人場，沾沾旺氣！

至於內房及內銀股，同樣受到中央對樓市採取嘅宏調措施所影響，特別係今年新增信貸額度未必及往年之下，內銀股必須加快拓展海外市場嘅步伐，以擴闊業務增長基礎。至於內房股，具財政實力嘅大型內房股，依然值得投資者長線持有，畢竟人民幣升值大趨勢未有改變，加上通脹之勢明確不過，喺長線投資者眼中，長揸內房股係坐享內地資產升值嘅好方法。

虎年年尾，阿莊買咗隻港鐵（00066）壓年，取其攻守兼備，年三十半日市，該股股價升1.7%，報29.35元。踏入兔年，兔仔特色係紮紮跳，予人生機勃勃之感，所以兔年首隻股份推介，就揀咗新興產業龍頭股騰訊（00700）。

講開Q仔，新春期間海外市場消息指，Q仔擬進行一宗海外大型收購，目標係美國洛杉磯遊戲開發商Rilot Games Inc，估計涉資介乎3.5億至4億美元，此乃繼上月公司宣布與日本第二大社交網絡公司GREE結盟，共同開發中、日社交遊戲和應用市場後，拓展海外市場又一大舉措。

積極開拓海外市場

喺內地政策鼓勵新興文化及資訊科技產業發展，以及三網融合嘅政策下，圍繞互聯網、電訊網、廣播電視網嘅新興文化產業百花齊放，但當然，當市場發展至一定規模後，企業要維持高增長並不容易，加上競爭激烈，企業要保持業務高增長，就必須要設法突圍而出。

擁有喺股市融資功能嘅大型上市企業，「走出去」開拓海外市場係業務發展嘅大方向。踏入一一年，騰訊積極加快拓展海外市場之意甚明，結合其於內地市場嘅優勢，海、內外業務一加一大於二嘅效果值得期待！虎年騰訊股價表現大部分時間都係原地踏步，直至年尾才再次起動。兔年伊始，騰訊股價若然能企穩喺200元大關，可確認走勢突破，隨着公司落實更多新業務發展，股價可望步步高陞，再展「股王」魅力！

戰報

中國通信服務（00552）

姚午齊於一月二十五日睇好中國通信服務，上周三終於起動，勁升0.31元，較推介日升超過8%。

金隅股份（02009）

Sammi於一月二十七日話金隅可受惠保障性住房增加，真係無介紹錯，話咁快就已升7.6%，果然厲害！