市場徐想：澳門經濟 繼續起飛
剛於上周末，筆者展開咗二十四小時澳門業務團，分別同賭場大佬茶敍，出席澳門金融從業員晚宴。因為筆者係佢哋嘅顧問，每三年都要出席一次，以示對澳門金融業嘅支持。
筆者成日同人講笑，香港人去澳門，唯一優勢係過關可以用「e-道」，凸顯其所謂優勢，內地嘅「好安答」就要一步一步慢慢嚟。筆者於○五年曾因工作關係，需要一星期往返澳門兩次，去澳門，好似返工一樣，見證着澳門經濟由衰變盛，回調後再衝嘅境況。
如果講澳門，大家肯定清楚「賭」必定成為佢嘅核心力量，去年十二月澳門賭業嘅收入破咗單月紀錄，增長58%，達1,883億澳門幣。同美國拉斯維加斯比較，四倍是也。經濟環境改善，令到消費更鬆手，內地「安答」係佢哋嘅貴客，加上基建配合，例如新廣珠輕軌鐵路同武漢到廣州高鐵線，全部都係推動澳門賭業再與天比高嘅利好因素。