Fundman睇市：聯通具長線升值動力

恒指近期選擇性跟內地股市走，唔再以美股馬首是瞻，上周五儘管道指高收，惟股市氣氛受制於內地春節前可能加息，以及中央可能推出更大規模的壓抑樓市措施，恒指尋日續跌75點，收報23,801點，成交更縮到得646億元，是今年次低紀錄。仲有個半星期就踏入農曆新年長假，基金經理實行少做少錯，等人行貨幣政策明朗化至算。

尋日有美資調查機構話，香港住宅樓價全球至貴，分析認為樓價去到家庭中位數年收入5.1倍，經已好難負擔，而香港樓價更去到家庭年收入中位數的11.4倍，係極度難以負擔嘅水平咁話。

香港寸金尺土，唔少打工仔窮一生精力只係為咗四幅牆，而且近年中國經濟火熱，借任總金句，香港樓市再唔係七百萬人市場，變咗十三億人市場，大量內地熱錢南下投資，令香港樓價超出本地經濟因素，不斷向上攀升，調查結果本來就唔叫人意外。

然而，筆者認為計算方法還是有所偏差。香港貧富懸殊情況（堅尼系數）冠絕亞洲，君可見，通街名貴跑車的同時，天光墟可以買到半支用剩牙膏。聯通具長線升值動力

過去十年，香港家庭收入大約維持18,000元咁上下，變動唔大，但人均GDP卻幾乎升近五成去到3.5萬美元，可見大部分中低收入打工仔，根本分享唔到經濟成果，社會盈餘落晒一小撮有銀人士身上，而佢哋才是私樓市場的潛在買家，而接近半數人口，住在政府補貼的居屋或公共房屋，如果只計私樓業主收入與樓價比例，相信得出結果，雖然香港樓價都係唔平，但同家庭收入比較，絕不會去到11.4倍咁誇張。

iPhone成手上王牌

內地電訊業經一輪改革後，中移（00941）不再獨大，聯通（00762）及中電信（00728）雖暫時未能挑戰中移地位，但以往在業務發展一直遠遠跑輸的情景不再，3G的推出，更成為後兩者壯大的重要階梯。據統計，去年內地3G用戶淨增長3,683.4萬戶，累計達到4,705.2萬戶；三大營運商中，中移去年3G用戶全年淨增1,729.4萬戶，達到2,070.2萬戶；聯通淨增1,132萬戶，累計達到1,406萬戶；至於中電信全年淨增822萬戶，總數達到1,229萬戶。

由數字上嚟睇，雖然三大的排名仍然係中移領先，聯通排第二，中電信包尾，但當中要留意嘅係，聯通手上擁有iPhone呢張王牌。據聯通方面的數字，截至去年底，其iPhone用戶已超過百萬戶，即相當於其3G用戶的一成左右，年內透過聯通出售的iPhone 4手機達130萬台，而iPhone用戶的ARPU值平均高於200元人民幣。可以說，若計及客戶質素及ARPU，聯通在3G市場上的競爭力，絕對可以挑戰中移的一哥地位。

利好消息暫未反映

昨日聯通更宣布，跟西班牙電訊簽訂戰略合作協議，互購5億美元股份，未來九個月內完成有關行動，意即西班牙電訊會在市場吸納聯通，其持股量未來將增至9.7%，對聯通股價自然有長線利好作用。昨日聯通股價微跌0.6%，似乎市場對消息的反應不甚強烈，但相信這是因為股份在早前已隨一眾內地電訊股被炒起，消耗了部分上升動力有關。

目前，聯通雖同樣面對三大營運商的相互競爭，但以往一味捱打之勢不再，又趕上3G發展的良好時機，投資者現時上車不算遲，若然內地再有抽緊銀根行動令大市向下，此股絕對值得趁低吸納。