股海實戰： 思捷短線有條件反彈

誠如阿莊所料，臨近春節長假，股市交投開始轉靜，尋日大市成交降至只有646億元，恒指反彈暫受制於24,000點，收報23,801點，跌75點，全日波幅218點。藍籌股中，出口股表現較佳，利豐（00494）創五十二周高位51.95元，收報51.85元，升4%，成交4.6億元。

中糧控股（00606）發出盈警，預期去年全年純利將按年減少13%，主要係油籽和大米業務盈利同比下降所致。受消息影響，中糧股價一度急跌9.6%，收報7.8元，跌幅8.24%，成交5.3億元。

查實以現價計該股○九年度市盈率十五倍，即使預期去年度純利下跌13%，現價市盈率並非高不可攀，問題係投資者須重估其主營業務嘅毛利前景，特別係喺成本上漲之下，毛利率可能持續受壓，以致較市場預先估計為低，故不排除短線股價繼續走低，正所謂「寧買當頭起，莫買當頭跌」，都係暫作壁上觀為妙。

公司通告澄清一證券商嘅研究報告內容，證實去年八月公司已停止玉米乳常規銷售，消息引發股價大幅波動，股東真係睇到頭擰擰！再想起去年八月該股曾因延發業績惹起大風波，睇嚟「民企股透明度有待提升，股價須付較高風險溢價」呢個投資定律仍然合用，無獨有偶，阿莊組合中仍然拉閘嘅中國燃氣（00384），又係一個例子！

恒指偏軟，好在股仔每日都有新焦點，好似尋日鉑陽太陽能（00566）受長實（00001）等認購公司可換股債券消息刺激，一開波踢上0.65元，搶上0.69元後曾回軟，但尾市又再發力，收報0.68元，升19.3%，睇勢炒作未完。想起早前同樣憑藉超人點石成金而熱炒嘅中國木業（00269），睇嚟今年超人相當活躍於投資新興產業，跟住大孖沙腳步投資唔會有錯！

刀仔鋸大樹吼和黃CALL

講開超人，股權披露資料顯示，近日和黃（00013）頻獲大股東增持，阿莊維持睇季內和黃進身「紅底股」嘅預測。睇好和黃走勢，而又能承擔較高風險嘅「勇」者，刀仔鋸大樹之選，可以留意和黃德銀認購（25745），今年四月到期，行使價95元，10換1。

上文提及出口股，同樣受惠美國經濟復甦嘅藍籌出口股，仲有思捷環球（00330），尋日收報37.35元，升0.27%，成交1.86億元。老實講，隻股弱咗咁耐，阿莊唔敢講股價係咪經已見底，只係發覺近月該股有基金及非執董減持，但股價未有再大插，相反技術走勢顯示短線有條件持續反彈，小注一試未嘗不可，目標重上40至41元，止蝕位36.5元。

順帶一提，阿莊尋日話要買隻天津港發展（03382），坐言起行先落首注，以平均價2.16元買入20萬股等運到！

戰報

經緯紡機（00350）

史提芬上周五話經緯紡機盈利能力提升，推介日低位只係5.38元，股份昨日創五十二周新高5.93元，累升超過一成。

中國聯通（00762）

阿May於本月十四日吼中隻聯通，昨日最高抽升12.82元，較推介日低位11.38元升逾12%。