威高妙計銀彈留員工
農曆新年就到，內地唔少工廠開始收爐，工人都陸續返鄉下過年喇！大家都知依家內地三、四線城市發展得好快，好多廠商擔心過年後工人唔返嚟做嘢，但威高（01173）主席鄭鐘文好有信心咁話，唔擔心呢樣嘢！
鄭主席話畀太子知，從兩年前開始，佢哋就諗到一條吸引工人留低嘅妙計。
獎金福利好流失率低
就係工人過完年返工之後，會發一筆特別獎金，都有幾百蚊咁上下，加上原本工人平均人工都有2,000蚊，仲包食三餐，就連準時返工都會有獎金添！咁樣嘅福利下，工人流失率都比同行低。其他廠商老闆真係要學下，要留住工人都要度條好橋囉。
威高由製衣業務白手興家，到依家做埋化妝品，近年來生意仲愈做愈大，凡事親力親為嘅鄭主席話，自己通常都會跟進每一樣新產品同新合作，所以呢個農曆年都係放五至六日假，自己初七就「啟市」喇！