股海實戰：天津港係時候發威

內地通脹升溫，惹來中央再度收緊銀根的疑慮，上周股市震盪，恒指跌穿24,000點支持，全周下跌406點，報23,876點，但每日平均成交額維持喺700多億元。

展望本周，春節長假在即，假期氣氛轉濃，大市交投或會轉靜，指數繼續以三數百點上上落落，直至內地加息步伐明朗為止。一般估計，春節這幾天長假期正好係消化加息嘅冷河期，如此，則本周股市頗大機會提早反映加息之舉，並為春節後開市締造「開門紅」嘅機會！

藍籌股中，和黃（00013）再獲大股東增持，阿莊多次提到季內和黃可進身成「紅底股」，不排除業績前後就實現，90元邊可視為最後召集。此外，上周聯通（00762）亦靜靜地起革命，衝穿阻力位12元，上周五創五十二周高位12.42元，收報12.34元，升2.32%，成交6.43億元，升緊就無謂估頂。若然買唔切貨，阿莊上周推介嘅中電信（00728）亦係好嘢，可以把握短線調整嘅上車機會，可博走一轉。

講到出口股，上周從事內地港口業務嘅天津港發展（03382）股價異動，高位見2.26元，收報2.23元，升9.31%，成交1.54億元。

有追開阿莊嘅專欄，都知道早喺前年三月公司宣布大型重組計劃，本人已睇好呢隻股，話重組過後前景值得睇好，誰知重組過程長達一年，真係要命，結果惟有沽貨離場，幸好沽貨後股價繼續喺低位上落，總算喺嗰一刻冇再做錯決定。

重組完成添競爭力

直至上周，見其股價異動，已確認重上250日線樓上，乃自去年一月中旬以來首次重上此牛熊分界線，而且成交大增，呢鋪似係動真格。有理冇理，阿莊點都會落場追貨上番車，免得「情人結婚了」，但「新郎不是我」﹗

當日重組，天津港收購滬A股天津港股份56.81%股權，總代價109.6億元人民幣，而完成後，天津港集團成為公司最終股東，理順了系內公司嘅關係。隨着重組完成，天津港的規模顯著擴大，整體競爭能力及盈利能力均顯著提高，喺天津濱海新區開發、開放嘅歷史機遇之下，阿莊對呢隻股長遠前景樂觀嘅睇法未有改變。

去年首九個月，天津港股份實現淨利潤8.53億元人民幣，同比增長35%。按天津港嘅持股量，來自呢家A股公司嘅盈利貢獻有數得計。

截至去年六月底，公司手頭現金及等值約39.47億元，中期經營活動現金流入淨額同比增長12.5%至7.9億元。如今股價已重上重組時嘅股份對價作價2.0916元，意義重大。建議「買進」，今次呢鋪翻身戰打得有把握！

戰報

中銅資源（00476）

錢進上周五指中銅資源股價短線有力再上，當日曾升至0.96元，較即日低位0.85元，單日升近13%，眼光果然獨到！

中聚雷天（00729）

中國木業（00269）獲李嘉誠入股急升，志強上周四建議追入同具超人概念的中聚雷天，當日低位0.99元，周五一度高見1.09元，升10%。