股海實戰：德昌電機捕捉上車機會

高盛盈利大跌，美股前晚收低，港股尋日跟隨低開逾百點，內地股市告急，港股再捱一刀，恒指一度失守24,000點關，收報24,003點，跌415點，大市成交824億元。

尋日內地股市消息排山倒海，雖然「胡奧會」氣氛良好，兩國互送大禮，但內地經濟數據震撼股民嘅脆弱心靈，統計局公布上月通脹為4.6%，較市場預期為高；第四季度GDP按年增長9.8%，CPI按年上漲3.3%。

此外，內地傳媒報道，今年首兩周全國金融機構新增貸款已超過8,000億元人民幣，其中四大行新增貸款已達到3,400多億元人民幣，估計一月份全月新增貸款額將超過一萬億元，難怪本周二國務院總理溫家寶開腔，指要保持合理嘅社會融資規模和節奏，防止年初信貸嘅非正常投放，四大行似乎知驚，據講部分分行已暫停發放房貸。

凡此種種，令投資者擔心中央好可能會繼續出招收緊銀根，雖然剛剛才調高存款準備金率，但春節前加息嘅可能性似乎難以完全抹殺。人心惶惶之下，滬綜指再次失守2,700點關。

香港亦唔好得去邊，政府數據顯示，上月本港綜合消費物價指數按年上升3.1%，亦係兩年高位。「衣、食、住、行」，係做人無可避免要做嘅四件大事，偏偏食、住成本係咁加，各大運輸營運商已發出加價通牒，嚟緊「行」嘅成本亦勢必跟住加。百物騰貴，偏偏人工調整幅度追唔上，消費市道全靠內地同胞支撐。舊年投資者若未有分享零售股升勢，阿莊亦唔覺得意外，皆因香港人直覺真係感受唔到自己嘅消費能力大幅提升，結果眼前零售股嘅升勢只能看待成「美麗的童話」—齋睇！

個股方面，前日提及嘅中電信（00728），股價上到4.73元後現獲利回吐，尋日隨大市低收，短線喺4.3至4.5元水平會有承接，留意上車機會。

內地股市冇運行

舊年第四季，大家喺度講美金貶值、美國經濟烏雲蓋頂，美股唔使睇……，偏偏美金喘穩，美股反覆向上。如今睇落內地股市冇運行、反而美國經濟正體現寬鬆貨幣政策嘅威力，倒不如留意出口股嘅表現。

德昌電機（00179）超過一半收入來自中、港以外嘅海外市場，其中又以美國為最大嘅出口地。截至舊年九月底止中期，公司來自美國嘅收入同比增長24%至1.95億美金，嚟緊美國業務復甦進度可望優於預期，加上近幾年公司積極進行內部重整，調整業務模式，抗逆能力得到提升，去年末季股價表現跑贏港股。現價接近6元，一○年度預測市盈率已處合理水平，一一年度嘅經營環境清晰前，股價或會喺5至6元區域反覆，可以耐心觀察承接力，捕捉上車機會。

戰報

國信德銀購（25038）藺俠於上周三睇仲隻國信德銀購，主要是看好電訊股表現，當時低位0.207元，昨日曾高見0.345元，勁升逾66%。

中海集運（02866）錢進於本月四日指中海集運具追落後條件，股價昨日曾一度抽升至4.11元，較推介日低位3.66元，累升近12.3%。

\