麥博士變身做大鱷?
對沖基金潮流席捲各地，就連一向做開長倉基金、有「新興市場之父」之稱嘅鄧普頓資產管理新興國家投資團隊執行主席麥博士，都傳出話有興趣成立對沖基金，呢個市場愈來愈熱鬧。
籌備成立對沖基金
麥博士喺基金界享負盛名，依家管理緊全球超過400億美元嘅資產。尋日有外國通訊社向佢求證，佢承認正考慮設立對沖基金，但由於計劃未落實，所以未透露詳情。唔知係咪仲有啲細節未搞掂，太子問佢哋嘅發言人，就話現階段未有確實嘅計劃，但佢哋一向都會開拓新嘅投資機會，以應客戶需求。依家市場需求正正係呢啲投資進取、回報高嘅對沖基金，太子斷估，由麥博士主理嘅對沖基金，可能喺不久就會同大家見面。
點解連投資大師都爭住搞對沖基金？分析話因為收費和味，傳統基金嘅管理年費最低喺0.3%以下，但對沖基金就高到有2%，而且仲收埋表現費成20%，難怪大師級都要分一杯羹。