短炒倉:中聚雷天 熱身起跑

中國木業(00269)因獲李嘉誠入股,股價連日急升,昨日才告輕微回吐,但同屬超人家族成員嘅中聚雷天(00729)就接力,升3%,以1.02元報收。

中聚雷天主業係生產電動汽車用的鋰電池,食正當前電動車同環保能源嘅發展趨勢,去年獲超人入股後,股價由唔夠1元升到最高2.7元,但其後因公布中期業績勁蝕逾10億元,拖累股價急挫至0.78元。不過,業績不濟主要係因購併作出商譽減值,實質核心業務其實已錄得不俗盈利,加上股價跌至貼近超人入股水平,故惹來買盤趁低吸納,股價上月尾曾單日急升逾三成,之後於1元水平橫行。

近日超人一系動作多多,除入股中木外,又分拆碼頭業務於星洲以信託形式上市,仲有計劃發行人仔REIT等,而一眾家族成員股價亦先後炒起,但中聚雷天仍處於低水平,昨日升勢相信只屬熱身,志強認為可放膽跟進,目標1.5元,止蝕0.9元。

跨媒體地產網新居入伙 幾萬個精選樓盤 歡迎睇樓!

Money18新功能「18好路數」為你預測心水股票升跌機會率

志強