股海實戰：中鐵勝在實力雄厚

國家主席胡錦濤抵達美國展開國事訪問，大債主頭號人物駕到，奧巴馬政府毫不怠慢，以最高規格招待，昨日兩國能源部便簽署十八份總值逾130億美元嘅能源合作協議，對美國經濟穩步復甦以至美股投資氣氛有利冇害。

之不過，內地股市受惠呢場大龍鳳嘅程度似乎有限，滬綜指昨日靠穩，未有太突出嘅表現，皆因如今全國遭遇極端氣候變化影響、通脹加劇、加息陰霾籠罩，加上繼兩份官方傳媒先後重申要繼續調控樓市後，國務院總理溫家寶近日主持國務院會議，又再次強調要堅定不移做好樓市調控。

雖然近期港股繼續牛皮偏軟，但交投得以維持，昨日大市成交812億元。牛皮市無礙上市公司集資，只要企業本身交得出經營數據，配股集資亦唔難搵到捧場客入飛支持。好似尋日執筆期間，聽到兩則配股消息，其一乃指中國無線（02369）配售1億股，另一則謂建銀減持中國智能交通（01900）逾1億股，兩者共同點乃所屬行業均處於上升周期，二選其一，阿莊屬意博中國無線。

此外，尋日係尾禡，仲有唔到半個月就係春節，又係辦年貨嘅時候，金魚缸有咩好嘢買？阿莊都係鍾情鐵路股。

講開又講，尋日內地A股鐵路基建股有異動，事緣消息指中國企業訪美，正進行勘探地形工作，以準備競標當地嘅高鐵建設項目。受相關消息刺激，加上時值春運高峰期，A股中國南車（601766）及中國北車（601299）昨日股價均告上揚，整個鐵路基建板塊亦隨之起動，有7隻股份漲停板。

鐵路板塊全線起動

手持組合中，阿莊對股膽中國南車（01766）信心未改，昨日曾搶高至11.28元，會繼續耐心持有。

鐵路基建板塊股中，可以睇吓隻中鐵（00390）。中鐵去年第三季度實現淨利潤21.4億元（人民幣．下同），去年首九個月純利則為54.25億元；首九個月累計新簽合同額5,689億元，同比增長36.8%，而在這些新簽合同中，基建板塊完成1,793億元，同比增長23%，可見去年整體經營狀況穩步增長，受惠城鎮化及交通發展，盈利前景可繼續看好。

再睇估值，一○年及一一年預測市盈率分別為十二倍及十倍，以一家公司整體毛利率僅介乎6至7%，呢個估值唔算得上特別便宜。不過，明白內地遊戲規則，好多大型基建項目都係由國企包辦，中鐵憑着股東背景優勢，生意長做長有。用大半隻公用股嚟看待，若然嚟緊派息率上升，將有助提升吸引力。

股價方面，中鐵昨日收報5.93元（港元．下同），底部支持上移，向上仍受制於6元阻力位，在成功突破前，策略宜喺5.5至6元水平高沽低揸，成功破位的話，阻力位上移到6.4至6.6元。

戰報

泓淋科技（01087）錢進周一指泓淋科技走勢轉強，即將起動，股價昨高見2.95元，較推介日低位2.62元，累計升幅近12.6%，果然厲害！

晨訊控股（02000）冼金基上周四認為晨訊跌過龍，可以趁低撈貨，昨日一度升至1.71元，若於當日低位1.52元上車，可賺12.5%。