歐元之父力撐美元
尋日「歐元之父」蒙代爾喺香港出席一個論壇，講黃金同儲備貨幣，面對一堆刁鑽嘅問題佢依然談笑風生，有時仲把握機會幽對方一默，佢又話唔建議人民幣升值，中國可以承受人民幣輕微升值，幅度太大會引致熱錢流入，令通脹惡化，十年後如果人民幣可以自由兌換，有機會成為國際儲備貨幣之一，又話美元會繼續係國際間嘅儲備貨幣。
話說幾年前恒隆（00101）主席陳啟宗曾經問過蒙代爾，美元可以做幾耐儲備貨幣，蒙代爾嗰陣答「一百年」。
儲備貨幣做多90年
尋日陳啟宗再問佢同一個問題，雖然投資者依家對美元嘅信心已經動搖，不過蒙代爾依然好肯定咁答「九十年」，化解咗陳啟宗尖銳嘅問題。
論壇上有唔少人都唔係幾滿意美國大印銀紙，採取放任嘅貨幣政策。蒙代爾就唔係咁睇，佢話美元自由流通，無論係央行或者個人，唔鍾意可以唔揸。