股海實戰：中電信iPhone概念有得炒

本周人行暫停發行央行票據，引來市場揣測，加息行動或延至春節後，內地A股有喘息嘅機會，滬綜指收報2,708點，升2.3點。喺借A股回穩及小QFII有望推出嘅消息下，恒指開市後逐步收復失地，可惜市場觀望氣氛仍濃，高位承接不足，最終掉頭微跌兩點收市，大市成交769億元。

講到內地股市，值得一提嘅係昨日滬市及深圳中小板分別有一隻及四隻新股上市，結果全部「破發」收場，顯見如今A股市況真的不濟。事實上，阿莊跟內地股友閒談，聽表叔語氣對今年A股表現未抱太大希望，多傾向調撥資金嚟香港炒作，故見到先後有大行分析指今年港股表現或可跑贏A股。

即將進入業績期，唔少企業發盈喜，東岳（00189）料去年業績按年大幅上升，受消息刺激，昨日股價曾抽上5.05元，收報4.83元，升3.2%。同樣發盈喜而股價上升嘅有經緯紡機（00350）同中鋁（02600），股價分別升3.7%及5.4%。不過，兩隻鋼鐵股鞍鋼（00347）及馬鋼（00323）雖然亦係發盈喜，但鞍鋼股價僅升0.49%、馬鋼則倒跌2%，正回補月初嘅上升裂口。

中國木業（00269）成功引入李超人成次大股東，但昨早未見其股價異動，已感奇怪，勢估唔到原來係畀位大家上車，中午前買盤殺到，搶至日高位0.51元，收報0.49元，升19.5%，再一次顯現超人點石成金嘅威力！受中國木業升勢帶動，其他林業股亦有資金追捧，中國林大（00910）升至全日高位0.28元收市，升幅16.18%。

地產股表現硬淨

以往春節前係樓市淡季，但今年卻例外，皆因去年政府出招打擊樓市炒風，樓市應旺不旺，待市場消化行政措施嘅心理影響，買家跟炒家見樓價唔多落，但通脹之勢猛於虎，心急入場買磚頭，致使臨年尾反而多咗人約睇樓。難怪近期收租股同地主股表現硬淨，長實（00001）兼具地主及和黃（00013）大翻身雙概念，係首選股份；物業代理美聯集團（01200）股價有勢回補下跌裂口位，趁短線整固入場，上望7.8元。

此外，美國市場近期正式推出CDMA制式iPhone手機，令市場憧憬同樣使用CDMA制式嘅中電信（00728）亦可望喺短期內推出iPhone產品，其中大行摩通更預期，待今年上半年成功推出CDMA制式iPhone產品後，以五年折現嘅現金流模式計，可為中電信每股增值1元，故給予「增持」評級。

上周中電信股價由4.1元抽上4.5元水平後引發調整，惟喺10日線4.25元找到支持，昨日再現升勢，收報4.49元，升幅4.6%，股價呈「V」形反彈且有交投配合。按炒作思維，一日公司未正式推出iPhone產品，股價都仲有得炒，季內料可順利突破5元關，向下4元有支持。

戰報

中國木業（00269）

冼金基尋日指中國木業獲猛人垂青，股價昨日一度高見0.51元，較低位0.41元，飆升近24.4%，炒即日鮮相當和味。

中國全通（00633）

志強尋日都睇中隻中國全通，貪佢有女股神支持，昨日曾抽升至3.14元，較低位2.8元，單日升幅達12.1%。