員工守則過火瑞銀研改

瑞銀賓架有好消息！日後返工有望着番紅色「底底」、搽黑色指甲油，同埋食洋葱、蒜頭喇！點解咁講？事緣瑞銀上個月頒布咗份44頁厚嘅「員工衣着守則」，不論衫褲鞋襪，仲有內衣、指甲、耳環、眼鏡、留鬚，連食乜嘢都管一餐，呢本「訓導手冊」一曝光，畀全球行家笑到收唔到聲，搞到瑞銀前日尷尷尬尬話考慮執執啲規條。

內衣食物都要管

瑞銀發言人克恩話，之所以咁長氣提醒員工着得得體啲，儀容檢點啲，都係想提升番瑞士賓架個專業形象啫！長遠嚟講對瑞銀形象有好處，依家諗住只係要求前線員工着番公司指定顏色黑、白、紅，即係男職員黑西裝褸、白恤衫同埋打紅呔無走雞。

但份員工守則裏面唔少規條，連太子都覺得過火。上次咪提過「大口氣」源頭嘅洋葱、蒜頭唔畀食；女職員要着肉色內衣；男嘅唔畀着卡通襪，三日要剃一次鬚，同埋一個月恤一次髮嘅；眼鏡要常清潔；要戴腕錶，畀人感覺守時可靠；女士要常修腳甲，令對絲襪襟着啲，隨身戴多對「士啤」為佳。

瑞銀畀人笑到面黃，瑞信話每間瑞士銀行不嬲會派員工守則，雖然瑞銀尺度荒謬，但唔止銀行業，油站、漢堡包店同埋超市員工都要着制服。