股海實戰：和記電訊業績躍進可期

內地本周起將公布多項經濟數據，包括CPI、PPI、第四季GDP增長等，而未來數天「胡奧會」亦成為舉世矚目嘅話題，此前投資者都駐足而觀，一動不如一靜，故見昨日內地A股及港股雖然低收，但交投未有明顯增加，反映沽壓並非想像般大，只係市場觀望氣氛較濃，市況缺乏承接而已。

去年人民幣實際有效匯率升咗4.72%，再一次說明揸人民幣比做港元存款好得多。個股方面，上周才掛牌嘅開易控股（02011），收咗幾日貨，昨日藉基金股東入場增持嘅消息炒上，高位做1.68元，收報1.67元，升26%，成交8,686萬元，上周見隻股冇咩動靜沽貨者，真係要追到氣咳。

講到新股，聽講華能新能源上市計劃擬捲土重來，昨見同屬新能源概念嘅中電新能源（00735）有異動，以全日高位0.77元收市，升幅6.94%，短線若能企穩250日線0.75元樓上，可確認扭轉去年次季以來嘅下降趨勢，向下支持在0.65元，呢啲位值得一試。

繼續睇睇啲股仔，佳華百貨（00602）股價近期頻見異動，昨日一度高見1.01元，收報0.93元，升3.33%，成交4,847萬元。公司公布授出購股權，可按行使價每股0.9元認購合共7,111萬股新股，同日通告澄清未有就盈利或收益作任何預測。此股現時市值9.6億元，假設去年經常性溢利按年持平，預測市盈率達三十三倍，但此估值未有反映近年公司重整業務網絡以及拓展廣東省以外二線城市業務嘅成效。

上周，佳華股價震倉過後便坐上火箭，老實講炒味頗濃，且觀察落實擴展業務計劃嘅步伐，能否支持股價上升。

iPhone帶起上台熱潮

又睇番啲大晒士股，過去一年3G智能手機熱賣，特別係iPhone帶起上台熱潮，兩家3G電訊供應商數碼通（00315）及和記電訊（00215）欣然受惠，皆因3G上客理想，帶動增值服務業務增長，每月每戶平均收益（ARPU）持續上升。

有別於過去本地電訊市場增長平淡，「零和遊戲」之下，同業競爭激烈，過去一年3G市場擴張，令整個電訊市場恢復增長，並足以支持兩大營運商經營表現各自各精彩！數碼通股價由去年九月升至昨日見歷史高位18.4元，唔到五個月累升幅度達1.3倍，較前年底累升幅度為1.8倍；同期和電嘅累升幅度則分別為26%及1.15倍。

再睇估值方面，數碼通現價○九年度市盈率接近三十三倍，而和電則為二十七倍。和電去年上半年純利3.6億元，前年度純利4.68億元，幾可肯定去年全年純利又再一年大躍進，加上呢期長和系股份當旺，可以順勢逢低收集和電，最快公布業績前後可望有理想回報！

戰報

中化肥（00297）

阿莊上周五推介中化肥，股份昨日升至4.58元，較推介日低位4.16元累計升幅達10%，果然眼光夠準。

通達集團（00698）

昨日通達逆市展強勢，最高升至0.53元，較錢進本月四日推介時的低位0.425元，累計升幅近25%，真厲害！