柳傳志妙喻中港瞎跛互補

成日話錢太多，資金同埋企業都要「走出去」，咁香港扮演咩角色？聯想（00992）主席柳傳志就妙喻，話兩者好似「瞎子揹着跛子走」，內地就係身體健壯嘅瞎子，香港係幫瞎子指明路向嘅跛子。柳傳志話，兩者間最緊要互信。

中國企業近幾年可謂到處shopping，大灑金錢購併。講到「走出去」買嘢，聯想收購IBM單刁都算係經典？尋日，柳傳志出席亞洲金融論壇時，被主持人，亦即係恒隆（00101）主席陳啟宗（Ronnie）問到，若然再來多一次，會唔會收購IBM先？

柳傳志話，當時收購問過自己好多問題，例如IBM點解要賣盤？買咗自己點令佢有盈利。結果，依家兩間公司嘅磨合算係完成咗，而聯想嘅市佔率亦都升咗好多，算係好成功嘅購併。

中資出海 港人指路

柳傳志總結話，香港喺內地公司做購併時，兩者就好似「瞎子揹着跛子走」，內地企業年輕力壯，但係睇唔清前路，香港呢位跛子就負責點明前路。

柳傳志話，就好似當年購併咁，雖然聘請咗財務顧問，但係自己都仲係十五十六，心諗財務顧問梗係想單刁成事啦！所以若然香港可以同內地企業培養互信，再憑住自己嘅知識帶內地企業走出去，咁就perfect啦！