股海實戰：中銀香港逢低就要買

上周五收市後，人行宣布自本月二十日起調高存款準備金率0.5個百分點。阿莊相信，投資者對於人行再度收緊信貸之舉並不感到意外，至於咁係咪意味着春節來臨前，人行暫不會再加息，經過剛過去嘅聖誕節人行突然加息經驗，短時間再次加息嘅可能性不能完全抹殺，待內地公布最新經濟數據後，政策會逐漸清晰化。

事實上，講到內地，最近南方受寒流影響，而北方則出現五十年一遇嘅旱災，天氣異常，勢必影響糧食收成量。糧價上升，將加大通脹壓力。當然，人行可繼續透過加息控制通脹水平，但同時又要冒着用力過猛以致影響經濟增長步伐嘅風險，可見當今嘅貨幣政策確實唔容易掌握。

回說外圍，由於上周五亞洲區收市後便傳來中國再度調高存款準備金率嘅消息，美股早段走低，其後喺金融企業業績消息利好之下回揚，結果美股連升七周，並創兩年半新高收市，港股ADR亦報升，其中大笨象滙控（00005）收報87.34元，升0.68%。睇嚟今日港股高開成定局，且看農曆新年前，恒指可否到去年十一月高位24,988點。

股份方面，繼長和系、大笨象及Q仔（00700）相繼發力後，若然嚟緊指數要更上一層樓，下一個發力嘅藍籌會係邊隻？為此，唔少人會想起中國人壽（02628）同中移（00941），二選其一的話，阿莊傾向選擇有三網融合概念嘅中移。

人民幣國際化進程又邁進一大步，上周人行宣布，推出境外人民幣結算試點，即放寬內地機構在境外用人民幣直接投資（ODI）。業界估計，此舉將令人民幣嘅海外流通量大幅增加，屆時香港可積極發揮人民幣離岸市場嘅功能。

人民幣概念成賣點

截至去年十一月底，香港嘅人民幣存款總額約為2,800億元，未來這個數字會以較快速度上升。券商中金預計，到二○一五年，香港嘅人民幣存款額將增至2.9萬億元，佔總存款比例27%。資金池「水源」充裕，將有助本地金融企業加快拓展各種人民幣產品，如企業借貸、人仔IPO等。

作為清算銀行嘅中銀香港（02388），其人民幣國際化概念甚為突出，今次亦將可率先受惠新政策，上周五股價升2.94%，收報28.05元，成交11.25億元。

雖然目前五大內銀都喺香港設立分行，但睇真啲其實只餘下中國銀行仍然透過持有上市公司（中銀香港）從事香港嘅業務，喺選擇唔多之下，中銀自然容易享有較高嘅估值，而事實上，中銀香港向以高息取悅香港股民，以現價計息率都有3.45厘，好過存款息率，加上其人民幣業務愈做愈大，盈利前景可睇好，股價一回就要睇位買！

戰報

味千（中國）（00538）

味千近日呈強勢，Sammi於上周三就吼中，跟佢於當日低位13.88元上車，至周五已抽上15.3元高位，累升逾10%。

+10%

偉仕控股（00856）

錢進上周三推介的偉仕控股果然有料到，當日低位2.49元，上周五抽升至最高的2.8元，累計升幅逾12%。

+12%