陽春早到 旺市乏後勁?

農曆二十四個節氣裏面，有小寒同埋大寒，今年小寒就喺一月六日，大寒就喺下個禮拜四。根據傳統，由小寒到大寒之間嘅日子，就係每年最凍嘅時間。過去呢個禮拜，Paul少凍到幾乎唔識郁，但同時亦都體驗到古人嘅「傳統智慧」。

不過，樓市嘅「傳統智慧」又再次失效。過年前樓市例靜嘅傳統，近呢幾年都有好幾次被打破咗，今年亦都係早咗喺農曆新年前，就已經出現樓市小陽春。Paul少早幾日同周董傾過電話，佢話各大二手屋苑成交量，喺一月份全面以倍數計上升，個勢旺到佢哋都有啲措手不及。發展商亦都「兵貴神速」，準備再起動推出大型新盤，而且亦都係按照往常嘅策略，以一啲成本較低，而且「容易轉身（即係調整售價同埋銷售策略）」嘅新界盤嚟打頭陣，先試一試一手市場嘅水溫，睇吓係唔係同二手市場一樣咁熱。

炒家絕迹市場多變數

雖則旺市重臨，但周董話，佢同班同事都有少少憂心，就係小陽春今年提早到，咁會唔會同樣都係提早完結，結果去到三月未完就全部坐晒喺公司呢？Paul少好官腔咁答佢：「呢個問題其實冇乜肯定嘅答案噃。」老實講，Paul少唔係想「耍」佢，但係樓市小陽春可唔可以喺農曆新年過後持續，好關乎市場個「底」究竟有幾厚。今年小陽春除咗早嚟之外，另一個特別之處，就係冇咗炒家購買力，即係等於打個八五折，冇咗呢批客源，樓價可能冇升得咁急，但係就令到市場多咗變數。

究竟市場購買力，喺缺乏投機炒家嘅情況下，會唔會支持得到二、三月。喺呢方面，大家都缺乏經驗可以參考（因為實在未試過樓市喺一夜之間趕晒啲炒家出場），所以未必能夠咁容易推算到二、三月嘅市況。

另一樣值得思考嘅就係，當客源嘅數量同埋類別都少咗嘅時候，一手新盤同埋二手市場之間，會唔會又再凸顯矛盾呢？事實上，過去呢一、兩年，樓市水浸，客源充足，一手同埋二手市場可謂各自各精彩，尤其係一手樓定價愈嚟愈進取，同二手市場更加clear cut，但未來一段日子，客量逐步減少，就未必係咁perfect。

辣招失效或再「度橋」

不過，最令Paul少擔心嘅，始終都係嗰班「神經刀」政府高官。因為上年政府幾次出手，唔單止timing顯示佢哋後知後覺，同時出招嘅方式，亦表現出佢哋冇經過全盤考慮，旨在喺富人面前擺吓官威，或者喺普羅大眾度撈取民望，根本冇諗過要令樓市健康啲發展。近排樓市重拾升軌，社會的輿論都話政府啲辣招已失效，Paul少實在不排除有人會覺得冇面而又再「度橋」搞搞個樓市，到時真係大家都冇啖好食。Paul少都希望純屬自己過慮而已。