內地女強人愛買貴跑車

女士們嘅能力愈來愈大已經唔係新鮮事，而呢個現象近年喺一向重男輕女嘅中國內地亦愈來愈明顯。最近中國嘅百萬富翁中，就有三分之一係女性，足見中國女性嘅影響力。隨着女強人數目增加，內地消費品市場亦起咗特別嘅變化，其中一個係大家都估唔到嘅豪華汽車市場。根據生產法拉利嘅飛雅特表示，喺中國市場買旗下瑪莎拉蒂（Maserati）嘅女性係歐洲嘅三倍，而內地買法拉利嘅女性就係世界平均嘅兩倍。

望與男性睇齊

尋日太子睇到一篇關於內地女強人買車嘅報道，其中一個建築公司總裁Lily，佢兩年前用120萬元人民幣買咗部保時捷，最近又睇中部阿斯頓馬丁嘅跑車，Lily總裁話，當駕住部車兜風時總會成為焦點，感覺特別得意，佢更不諱言，跑車通常係男人嘅世界，女性買跑車只係為咗同男性平起平坐。

另—位搞酒店生意嘅Sarah，佢已經有9部豪華靚車，依家又搵緊新目標，Sarah當年為咗學駕瑪莎拉蒂，瘋狂到親身飛去意大利上堂，至於點解咁鍾意買靚車，佢就話依家嘅女士承擔咗好多男士嘅工作，做嘢好辛苦，好希望透過物質獎勵自己。