Fundman睇市：阿里巴巴不妨炒一轉

自從QE2推出以來，環球金融股，尤其係美資銀行股就愈升愈有，講到底，市場睇死美國政府唔會畀大銀行執笠，投資者於是肆無忌憚，跟風炒作。

睇番去年九月初至今，美銀股價升咗23.2%，花旗集團升40%，滙控（00005）雖然唔算係美資銀行，但金融海嘯後卻因為北美生意拖累，股價好似失速直升機一樣，即使近日連日抽升，但同期都只係升咗14.2%，能否順利突破去年十一月高位88.45元，會係港股後市關鍵。唔信睇吓尋日升市，藍籌其實是跌多升少（25跌、19升），滙控及騰訊（00700）已貢獻恒指80點，佔升幅七成，相反地產及石油股則開始升到滯滯哋。

本地股民可能未感受到，但科網股熱確實有復燃迹象，今次落鑊的再不是那些用眼球數目計價的美國dotcom，反而係祖國的科網公司，到美國上市通通有火熱的成績。

內地網股再掀熱潮

香港人慣用Youtube，內地迷網之徒卻無不愛死優酷網（Youku），這間被譽為中國Youtube的網上播片網站，去年十二月到納斯達克上市，首日報收33.44美元，比發行價12.8美元大升1.6倍，雖然破唔到另一隻中國網股百度○五年上市首日「狂」升3.54倍的紀錄，但經已係五年來納斯達克上市首日表現最佳股份。而於去年十月，亦有一家內容傳輸網絡商ChinaCache在納市掛牌，首日勁升95%。難怪基金對這類新股無不趨之若鶩，皆因有貨在手，短期幾乎是穩賺不賠。

常言道了解歷史，可以避免重蹈覆轍，事實係咪咁？科網股災十周年，有趣的是今浪投資者趨之若鶩的內地網股，同樣大部分都係介乎唔多賺錢，甚至蝕錢的情況。當然今次故事講法唔同，因為中國有13億人口，是美國3億人口的幾倍，市場擴展空間更大。更重要的是，內地網股供應量相對仍然稀缺，錢多但選擇少之下，泡沫自然好容易成形。

最近中國網股的炒風，有蔓延到香港的情況，阿里巴巴（01688）股價短短十多交易日內，由13元升到尋日一度見17元，而且成交也見遞增當中，睇走勢唔似炒幾日貨仔散檔咁短癮。

阿里巴巴在○九年金融海嘯之後，股價反彈見22.5元高位，之後陰陰乾，跌足十五個月，落到最近的13元左右。論估值，一一年市盈率36.8倍，如果於未來三至四年，交到平均每年四成左右的增長，換句話，三年後盈利可由14億元（人民幣．下同）左右攀升到40億元，那市盈率就可以落番去18.1倍，但係有冇咁易，見仁見智吧！

憧憬淘寶天價上市

對比大部分喺北美掛牌而仍然蝕緊錢嘅中國網股，阿里巴巴多一個賣點，就係仲有PE，更重要嘅係，市場不時傳出，姊妹公司淘寶，這間萬千股民期待的網上購物網站會上市，如果到時用一百甚至一百五十倍市盈率招股，阿里巴巴會有乜反應？看官不妨自己諗諗。雖然講明唔值得長揸，但炒吓都無壞。