股海實戰：中化肥業績看高一線

騰訊（00700）股價自去年十月一直喺高位橫行整固，直至本周終於開快車，昨日一口氣踢上全日高位198.5元，收報194.1元，升4%，創下上市以來新高，單日成交額達到15.9億元，真係好耐唔見呢隻Q仔有咁威水，捧場客可謂飲得杯落！

回說昨日市況，港股就憑大笨象（00005）及騰訊強勢持續做好，恒指一度衝上24,378點，收報24,238點，升113點，大市成交達到947億元。單計大笨象及中移（00941）二者成交合共87億元，而工行（01398）、建行（00939）及中行（03988）交投亦十分活躍。

港股整體人氣正在升溫，與近期內地A股交投淡靜，形成強烈對比。若然內地A股嚟緊幾個月都係維持咁嘅表現同交投，相信唔少擬上市嘅企業會轉投香港市場集資，民間資金亦會想辦法來港投資以爭取較佳嘅回報，所以若然要追重磅股，港交所（00388）亦可納入考慮之列。

零售股走勢呈一浪高於一浪，昨見六福（00590）股價創新高，全日高位29.05元，收報28.9元，升6.25%，成交2.22億元。講開零售股，其實隻東表（00398）都值得關注，近日公司入場回購股份，對股價起支持，昨日股價曾高見4.4元，收報4.35元，升5.8%，成交3,454萬元。還記得公司喺去年十一月下旬按每股4.38元配股集資逾2億元，而呢批股份設有九十天禁售期，限期前炒高機會不可抹煞，可以小注一試。

國航可分注吸納

昨日提及嘅中國國航（00753）股價回落至9.17元收市，跌3.47%，成交2.36億元。權益披露資料顯示，國航於本月十日獲主要股東入場增持，加上剛公布去年行業營運數據不俗，但股價卻不升反跌，真係估佢唔到。不過，阿莊維持此股可分注入場嘅睇法，若然調整過後能以大成交衝穿50日線9.6元，可先下第一注。

其他中資股，據高盛報告引述行業訊息指出，中國向俄羅斯等國進口鉀肥嘅交易已近尾聲，而傳聞中嘅交易條款做價較該行預期為低，而年期為六個月，較原先估計嘅一年為短，但進口量則較預期為多，反映在食品價格普遍上升，通脹壓力增加之下，今年上半年中國對鉀肥需求強勁，故相信中化肥（00297）可受惠。

事實上，今年以來，國家領導人已多番強調要保持主要糧食供應及價格穩定，相信對農業嘅支持會有增無減，中化肥嚟緊半年有望受惠產品價量齊升，業績確可睇高一線。

再睇其股價走勢，去年七月以來呈報復性反彈，股價由3元邊反彈上去年十月嘅4.8元水平才現回吐。基本上3.7至3.8元已形成一個較大嘅承接區，若然有利好消息，股價可反覆向5元關推進。

戰報

中國海景（08065）志強周三指中國海景大有炒上空間，昨日股價曾高見0.9元，較推介當日低位0.8元，短短兩日升幅已達12.5%。

熔盛重工（01101）史提芬於周二指熔盛重工有力重返招股價，昨日高位曾一度見8元，較推介當日低位7.1元，累計升幅達12.6%。