周文耀狄勤思 拍檔掌證監 ?

證監會行政總裁韋奕禮今個夏天就同大家講拜拜，政府將成立遴選小組全球招聘繼任人，一場「估領袖」遊戲又開始。「股壇大姐大」蔡陳葆心早前公開話港交所（00388）前行政總裁周文耀係合適嘅繼任人選，有中環資深賓架就「打蛇隨棍上」，開玩笑咁話，證監會CEO周文耀未必肯做，搵周文耀做證監會主席，狄勤思做證監會CEO好似更合理！

賓架讚狄勤思有經驗

嗰位賓架話，證監會主席屬非執行，不用理日常事務，個位又有面子，啱晒已經退休嘅周文耀。至於證監會CEO，喺芸芸香港人中，既熟悉證監會大小事務，又以香港為家，現任港交所上市科主管狄勤思肯定係其中一個理想人選。狄勤思做咗證監會多年，差不多證監會每個範籌都涉獵過，絕對係經驗豐富。

當然上述所講嘅都係市場人士嘅揣測，繼任人選目前都言之過早，反而應關注現任證監會副行政總裁張灼華今年二月底約滿嘅動向。事關佢續約，就自然係CEO嘅人選之一。巧合地，證監會主席方正今年十月任期屆滿，證監會人事肯定係焦點！