股海實戰： 國航分注入市候佳音

金魚缸人氣旺盛，與寒冷天氣形成強烈對比！昨日港股以大成交破關，恒指衝穿24,000點，全日高位做24,168點，收報24,125點，升365點，大市成交增至902億元，真係似模似樣！

藍籌股中，港口股再現強勢，招商局國際（00144）連現兩支大陽燭，昨日再升4.12%，收報34.05元；中遠太平洋（01199）亦唔輸蝕，收報15.02元，升6.07%。呢期股價過五關斬六將嘅和黃（00013）就要抖抖氣，昨日逆市跌0.4%，收報92.6元；滙控（00005）、騰訊（00700）及港交所（00388）接力向上，同升逾3%。昨日首天掛牌嘅開易控股（02011）最高做過1.49元，收市報1.35元，較招股價微升1.5%。

唔知大家有冇留意，三大內地電訊股之一嘅中電信（00728），近日股價走勢凌厲，昨日買盤尤為積極，收報4.52元，升4.87%，成交8.52億元，乃連續第二日現大陽燭。股價表現大勇，主要係有市場消息指，中電信將會銷售CDMA版iPhone產品，因而備受大行睇好。最近高盛便將中電信目標價調高至5.4元，中銀就睇5.57元。咁講法，照計呢啲位仲有上升空間，可留意上車機會。

近日與經紀吹水，提到最近美國國防部長訪華期間，從中國領導人口中驚悉「殲20」戰機成功試飛，比美國預期早咗九年咁多﹗可見今時今日中國實力非同凡響，亦成功為胡主席下周訪美造勢。究竟下周兩國領導人會談會有咩成果，投資市場正在高度關注，阿莊就相信，兩國喺推動節能環保技術方面有更多合作，可以多加留意相關股份，太陽能股首選保利協鑫（03800）及鉑陽太陽能（00566）。

昨日阿莊為大家推介嘅上海石化（00338），原來上周再獲基金大手增持，難怪股價升勢停不了，昨日再升6.3%，收報4.87元，成交金額2.21億元，突破5元關應該冇難度﹗

民航業盈利表現佳

另一方面，中國民航局官員最近在全國民航工作會上表示，民航業去年完成營業收入4,115億元人民幣，實現利潤總額437億元人民幣，按年分別增長37%及三倍，乃歷史最高水平。

要揀內地航空股，阿莊認為盈利能力最強嘅係中國國航（00753），所以若然睇好嚟緊航空股業績表現，國航可視為首選。

觀國航嘅股價走勢，○八年底以來進入大升浪，一直升到去年底，冷不防上月首三周股價跌勢頗急，短時間累積達三成跌幅，一度挑戰兩年多嘅上升軌支持，慶幸終於守住了250日線，喺技術指標嚴重超賣下觸發反彈浪。近日股價回升至接近50日線9.6元要抖氣，昨日收報9.5元，升3.3%。分注入市買定等業績報佳音，目標見11元，止蝕位8.6元。

戰報

中港照相（01123）

姚午齊周二認為中港照相全年業績值得憧憬，昨日股價創五十二周新高1.12元，較推介日低位0.97元，累升15.4%。

上海石化（00338）

阿莊昨日認為上石股價有機會於短期內再創新高，果然不負所望，高位曾升至4.96元，較低位4.6元，單日勁升7.8%。