太子手記：國美大團結谷生意

國美（00493）股權爭奪戰完畢，係時候收拾心情搞番好盤生意，大股東黃光裕嘅親信鄒曉春首度以國美身份出席國美供應商大會，當然唔少得主席陳曉，會上提出國美嘅五年計劃。不過，鄒曉春只到場打氣，未有發言。

據聞黃光裕老婆杜鵑即將重出江湖，喺下個星期出席北京國美體育用品公司記招，印象中，佢係國美股權爭奪戰後首次亮相公開場合。

鄒曉春出席是次活動，反映佢已加入國美團隊。太子聽內地朋友講，喺會上國美預期今年全年銷售規模複合增長達25%以上，未來五年平均增長達到15%。而陳曉早前傳出離職，佢喺會上反而轉趨低調，只話國美發展電子商務、提升單店效益等大方向嘅銷售策略。

杜鵑出席國美體育記招

另一焦點係杜鵑重出江湖，自從她被判緩期三年後，行蹤備受關注，佢接管黃光裕嘅產業，又傳出佢會出面幫手奪回國美股權，今次佢會同黃光裕嘅妹黃秀虹出席下周嘅國美體育用品公司嘅記招，講吓國美體育用品嘅戰略。

作為體育用品市場嘅初哥，杜鵑要現身支持吓，到時又唔知會吸引到幾多媒體到場。