短炒倉：中國海景 盈喜支持
去年的「家電下鄉」政策，除咗家電生產商受惠外，一啲周邊產業，亦同樣得益。
從事產銷泡沫塑料及蜂窩紙包產品，並提供綜合包裝解決方案業務的中國海景（08065）前日發盈喜，預期集團截至去年十二月三十一日止之年度盈利，將較○九年同期的1,460.2萬元大幅增加，正是受惠於經濟復甦及「家電下鄉」政策所致。簡單啲講，中國海景的主業，其實即係新電器包裝必備嘅發泡膠，並且在內地同業中具有領導地位，家電下鄉政策令電器銷量大增，對其產品需求自然愈大。
受盈喜刺激，昨日中國海景股價升2.4%，收報0.85元。睇番集團首三季盈利同比已上升59.4%，至7,045.8萬元，即使保守假設全年只賺8,000萬元，市盈率亦只係約6.5倍。集團上月以先舊後新方式配售9,687萬股，配股價0.87元，現價仲未返到去，可以預期，後市仍大有向上空間，目標睇1元，止蝕0.78元。
