Fundman睇市：利邦基金接貨無手軟

股市無常，筆者當然並不是說「九一一」之類的突發性事件，而是最難捉摸、仲係經常出現的人嚇人，講講吓當真。近期重慶徵收房產稅計劃，以及人行可能在去年十二月通脹數字曝光前加息的傳言，對內地股市影響顯而易見，滬綜指在2,800點水平上下100點之內，玩咗近兩個月仲係未有方向，尚幸是，港股睇嚟唔再等A股，自顧自追番外圍去年第四季的升幅，恒指尋日升233點，收報23,760點。

和黃（00013）勁升4元，報93元，距離十年高位99.8元又行近一大步，最近數碼通（00315）受惠智能手機普及，數據收入大升發出盈喜，令人聯想到，客戶基礎更大的和記香港（00215）業績唔會曳得去邊，尋日股價一度升近20%，母公司和黃3G業務版圖更大，預期電訊生意止血並開始賺錢，而這類故事也最能打動基金經理，年初至今和黃累積已升超過一成六，遠遠跑贏大市。

繼去年的工行（01398）私有化工銀亞洲後，再有本地銀行被私有化，台灣富邦金控提出以每股5元，向富邦香港（00636）小股東提私有化，出價只較去年六月底每股帳面值4.31元高出16%，當然難與早年幾宗二三線型銀行被天價收購相提並論，事關富邦金本身揸咗富邦香港七成五股權，擁有控制性股權，買到開心，買唔到亦無所謂嗰隻。

中小銀行股掀尋寶熱

心理上，本地中小型上市銀行買少見少，自然會惹來市場一陣尋寶熱，仲有條件賣亦有番咁上下規模嘅，得番大新（02356）、東亞（00023）、創興（01111）及永亨（00302）幾間，可是，由市帳率介乎1.58至2.6倍，估值都幾乎處於近十年的歷史上限，一旦押錯注，短炒變長揸嘅話就認真無謂。

事實上，過去一年全球銀行股平均估值無大幅改善，唯獨香港銀行股身價上升，算係相當異數。尋日瑞銀出咗份報告，比較中銀香港（02388）同星洲兩大銀行UOB及星展，前者去年股價跑贏星洲同業近60%，大家經營環境相近，都係處於超低息、同市場人均財富高等條件，睇落與其博本地中小銀行被收購，倒不如諗諗落後的新加坡銀行股仲好過。

男士服裝品牌代理利邦（00891），以每股7.5元配售1億股，集資7.36億元作為營運資金及未來收購品牌之用。利邦都算係一○年明星股，累積升幅1.79倍，公司在○九年十一月才上市，當時作價1.65元，十三個月後，基金以三倍半價錢接貨亦無手軟。講到底，基金依然戀棧中國奢侈品市場。

高估值不容出錯空間

大行估利邦一一年純利4.5億元左右，相當於27.6倍市盈率，另一自主男士西裝品牌利郎（01234）不過21.7倍，估值差距，同利邦盈利基數較低，未來三年預期增長率較高多少有關。另外，上月利邦斥資5.39億元收購Cerruti品牌，正式進軍一線男裝自主品牌市場，基金求貨若渴的心態可以理解。

不過，高昂的估值，亦意味着未來業績可犯錯的空間十分細。睇番利郎、利邦在去年第四季，股價幾乎原地踏步，似乎需要時間消化去年初的驚人升幅，三月利邦就進入業績前的blackout，會唔會趁批完股，在一、二月份內發布一啲利好消息，等接貨捧場客唔使食驚風散等三月底份業績？睇怕機會唔細，但以現時估值，三月之前要升穿9元恐怕唔係咁易。