洪丕正再戰馬拉松
一年一度嘅渣打馬拉松又嚟喇！大家可能記得，渣打香港行政總裁洪丕正（Ben）前兩年都有參加當中嘅領袖盃，為慈善機構籌款。今年都唔例外，太子八到阿Ben會聯同渣打亞洲區財務總監馮隆春，繼續參加領袖盃。
領袖盃全長兩公里多啲，阿Ben話前兩年都完成到賽事，不過問到佢今年目標，阿Ben好謙虛咁話順利完成就相當滿意，仲笑笑口咁話希望大家慷慨解囊，捐多啲錢支持佢跑。
比賽加入環保元素
大家都知渣打積極推動環保，今屆馬拉松都加入環保元素，例如減少運動員小冊子嘅用紙、重新設計選手包等。
單喺今屆渣打已經慳咗52公噸嘅碳排放，等於5,200棵樹一年嘅碳吸收量，咁有意義嘅措施相信大家舉手贊成，事關空氣清新啲，第時大家跑渣打馬拉松時都舒服啲。