股海實戰：領匯基金掃貨跟得過

美國上周五公布的就業數據表現遜預期，道指下跌22點，收報11,674點。嚟緊又係美國企業公布業績期，阿莊對於道指能否上試12,000點關抱觀望態度，畢竟QE2因素已頗大程度反映在現時的估值水平。

國家領導人在官方公布最新經濟數據前率先放風，話去年中央成功「保八」，預期一○年GDP增幅約為10%，內需強勁成主要動力來源。在「十二五」期間，中央講明要致力增加居民收入，理由好簡單，百物騰貴，若然收入追唔上，居民消費力下降的話，又如何能繼續以內需推動經濟增長？呢一點亦說明，未來內需股仍會是基金的重倉股類別，宜留意每次調整浪帶來的投資機會。

「胡奧會」前，市場正在關注中美兩國動向。國家主席胡錦濤將於下周三起赴美進行國事訪問，兩國領導人話題不離匯率、經濟、人權、兩韓以及氣候變化等話題。早前阿莊就揣測過，聖誕節人行突然加息，正係「胡奧會」前兩國早有默契嘅一個舉動。近日兩國高層頻頻互訪，相信仍就各項爭議性問題進行討價還價。

講到底，中美關係保持良好，對全球經濟持續復甦係好處多於壞處。時值年初，投資者都在盤算投資策略，阿莊就認為，大家必須清楚明白，今年乃各國「退市」嘅關鍵年，流動性持續趨緊，以及通脹壓力增加等多項因素影響之下，金融市場會以「穩」字為主調。

泰豐質得狠掃得狂

回說上周五個股表現，值得一提嘅係位居主板升幅榜榜首嘅泰豐國際（00724）。此股早前宣布收購中信物流90%股權，交易通函延至下月底或之前寄發。本來睇交易，公司發行代價可換股票據換股價每股0.4元，加上中信牌頭惹來憧憬，唔少股民都睇好。偏偏一○年十月上旬公布交易後，股價不斷走低，由高位0.54元，質到落上周低位0.202元，炒家少啲實力都畀佢玩殘！

到咗上周三，有內地傳媒分析上述交易，但上周四其股價仍未見有咩動靜，誰知上周五股價裂口高開，之後就浸浸上，並以全日高位0.315元收市，單日升幅48%。經驗告訴阿莊，呢類股夠晒刺激，唔係唔玩得，但策略宜先爭取喺低位贏一注，之後用利潤坐貨再玩。

講完炒股，又睇番啲大價股，本地地產股表現有改善，皆因券商計過數，相關股份去年度業績可受惠物業重估，所以掉頭買番上去。

相比起幾隻藍籌收租股，其實領匯（00823）表現相對落後，近日交投明顯增加，又見到權益披露資料顯示有基金入場掃貨，橫睇豎睇應該可以趕搭順風車。參考去年第三季其股價突破上半年橫行區後嘅升幅，現價進場目標可睇28至29元，止蝕位訂於23.5元。

戰報

亨泰（00197）

志強上周一指亨泰有突破，當日低位1.19元，周五股價逆市做好，並一度升上1.32元，累計升幅逾一成。

中國農產品交易（00149）

錢進上周二叫追入隻中國農產品，周五逆市做好，並高見0.59元，較推介當日低位0.46元累升逾28%。

\