增推細價樓不如建居屋

今個禮拜樓市依然係旺價不旺市，成交量雖然未至於「冰封」，但係喺淡季時節，始終都唔能夠即時旺番，所以Paul少好多代理朋友，都傾向「睇遠啲」，將焦點集中喺過咗年之後，期望到時大型新盤開售之後，市況會進一步明朗起嚟。

過去一年樓市興旺，地產代理同發展商都賺到笑，就算係房委會，收入都大增。最近房委會公布財政狀況就顯示，因為上年賣居屋貨尾，同埋超多嘅居屋補地價個案，令到今年房委會結餘破晒紀錄，比之前預測多咗超過58%。

上車客置業仍困難

其實，上年二手居屋市場興旺，同政府唔肯復建居屋有莫大關係，呢個炒居屋嘅機會，都係政府唔肯復建居屋所造成嘅，結果政府又用「強硬手段」去令佢消失。

Paul少幾個炒開細價樓嘅朋友，自從去年十一月之後已經「鳴金收兵」，佢哋話，今年睇怕都唔會再喺細價樓或者二手居屋市場出手，依家惟有得閒飲吓茶，再等另一啲投資機會。雖然細價樓炒風無疑係收斂咗，但係上車客置業依然好困難。

私樓開售勢高二手價

政府除咗推出額外印花稅，仲推出前元朗邨地皮嚟招標，而且規定要起近千個細單位，希望增加市場供應，紓緩樓價升勢。但老實講，情況根本唔係咁樂觀，因為呢一類地皮，就算大部分係細單位，但始終都係私人住宅，由私人發展商投資興建，喺無任何補貼或者優惠嘅情況下，呢啲單位他日推出市場，仍然會按私人發展商一貫嘅銷售策略同定價，咁即係仍然會高於同區二手市場嘅做價（除非到推出嘅時候，樓市已經一百八十度逆轉，咁又另作別論）。

其實大家都明白，依家唔能夠置業，叫苦連天嘅人，大部分都係一啲負擔細價私人住宅供款都感到吃力嘅小市民，加大私人住宅細單位嘅供應，其實唔會直接幫到佢哋。所以，有補助成分嘅居屋，先至最適合佢哋，一來房委會賣居屋，唔需要考慮太多是否「賺到盡」嘅問題，而且亦可以減省咗啲不必要嘅配套，對於資金緊絀嘅初次置業者嚟講，算係唔錯嘅選擇。

至於已經補地價嘅二手居屋，因為嚟緊呢一年，炒家會絕迹居屋市場，投資者入貨都會用嚟收租，令盤源未必會好似上年咁多。

所以，Paul少始終都認為，政府一日唔復建居屋，小市民難於置業嘅問題始終都冇辦法解決得到。