李嘉誠預咗經濟波動

尋晚長和系周年晚宴，主席李嘉誠一早就到，集團員工好想知佢點評新一年經濟，超人致詞時就話，香港基調都仲好好，又繼續受惠國家嘅高速發展，但始終會受到各種客觀因素影響，波動就難免喇！

超人都係勸喻大家，秉持「發展中不忘穩健、穩健中不忘發展」嘅宗旨。佢深信，憑藉集團喺世界50多個國家業務嘅雄厚發展潛力、分布全球嘅24萬名勤奮員工以及財務實力，對集團嘅長遠發展前景充滿樂觀和信心。

咁今年加人工同花紅又點呢？佢笑住話呢個最難答，集團下面咁多唔同生意，一般嚟講唔可以全部一視同仁，個距離差別好大咁話喎！

樓市走勢要睇通脹

近排個個關心通脹殺埋身，係咪投資磚頭穩陣啲，超人冇直接回應樓市走勢，只係話要「睇通脹厲唔厲害」，依家建築費亦一樣「貴咗」，依趨勢來看，通脹一定「厲害啲」，因為「差唔多每個人都知樣樣嘢都貴咗！」

另一個關注點，就係傳長實會打頭陣分拆人民幣REIT，佢話唔可以評論，相信同事做緊嘅嘢應該做得幾好。

和黃（00013）股價近日升得好靚仔，超人就話，要帶住公司做得更好，同埋對得住啲股東係佢嘅責任，股價高低係市場需求嘅問題。會唔會增持集團股份呢？佢話睇番過去兩、三年都係咁，除咗係啲唔可以買嘅時間，一般都會增持自己公司嘅股票。問到市場有傳聞話和黃有意收購電訊盈科（00008），李嘉誠就再三強調咁話，無可能，無啲咁嘅事！唔會嘅！

雖然超人尋日唔係講好多嘢，但見到一班等緊佢嘅記者，即時同大家講聲Happy New Year，仲邀請記者同攝記影張相，睇嚟心情似乎大靚！