短炒倉：中航工業 長炒長有
港股連升第七個交易日，真係由年尾升到年頭，而且升勢有擴散至細價股嘅迹象，志強自然加倍醒神。
中航工業（00232）一向備受散戶鍾愛，主要係貪佢爆發力強，好似去年九月，股價從0.36元起步，三扒兩撥就急升至0.46元樓上，之後反覆回落，直至去年底才在0.33元水平見底，並覓得支持。
中航工業截至去年六月底止的中期業績盈轉虧，蝕318.2萬元，雖然基本因素欠奉，不過市場一向對此股都是醉翁之意不在酒，主要是着眼於中航系重組，憧憬集團未來可獲得更多注資項目，一日未正式有着落，股價耐唔耐就會炒一轉，長炒長有。
昨日股價以一支大陽燭反彈，急升8.8%，至0.37元報收，成交金額984萬元，相信漫長的調整已告完成，以其過去一係唔升，一升就去到盡嘅風格，相信重上去年0.46元高位機會唔細，止蝕0.33元。
