華銳猛人股東 眼光獨到
過百蚊嘅股票喺內地好罕有，前日有隻叫華銳風電嘅新股正式招股，每股定價90蚊人仔，破晒上海歷來最高嘅發行價紀錄，班股東梗係身價暴升喇。其中一個猛人股東就係上海證券交易所第一任老總尉文淵，淨係揸住華銳嘅股份就值80億人仔，真係有眼光。
華銳成今年滬市首批面世嘅新股，呢間公司係內地風電整機裝備嘅龍頭企業，佢哋嘅發行價比起舊紀錄嘅神華多1.4倍。尉文淵係內地資本市場嘅大哥大，雖然佢當年因為「327國債事件」落台，之後一直好低調，但喺投資界仍好活躍，淨係睇佢間接持有華銳股權嘅市值超過80億人仔，就知道佢嘅眼光獨到。