短炒倉：卓悅係時候炒一轉
農曆新年消費檔期就快到，呢段時間又係炒本地零售股嘅時候，尋日幾隻本地成衣零售股都見表現不俗，JOYCE（00647）、堡獅龍（00592）同I.T（00999）分別升7%至一成不等。按照經驗，志強相信化妝品股又會係下一波炒上嘅對象，莎莎（00178）尋日已率先升3%，卓悅（00653）只升唔夠1%，自然更值得跟進。
受惠去年本地零售市道暢旺，卓悅截至去年六月底止中期盈利增長22.2%，至8,487萬元，相信全年業績可進一步向好。志強舊年十一月亦曾推介卓悅，當時股價為1.4元左右，目標1.75元，上月升至1.72元後回落，但去番1.5元水平已見跌唔落，呈橫行格局，尋日回升0.6%，收報1.56元，似係熱身前奏。
睇番卓悅走勢，舊年幾次炒到上1.7元左右都受阻而回，所以建議在突破此關之前，較宜以炒波幅為主，到正式升穿之後，才加碼追入未遲。
