股海實戰：瑞年有條件再翻炒

市場觀望美國即將公布嘅就業數據，但究竟去年十二月份美股升勢是否已經預先反映數據表現，實乃疑問，要提防好消息出貨。港股方面，昨日表現牛皮，恒指升至接近23,800點水平遇阻，但向下23,500點水平找到承接，最終收報23,757點，升89點。

昨日恒指高收，大笨象（00005）可謂功不可沒，曾高見82.35元，收報82.25元，升2.43%，成交額36.4億元。前日鄭大班曾評論集團赴上海國際板掛牌嘅進展，大概係仲要等待解決技術問題，但聽口氣似乎今年內有望實現。大笨象一般會喺三月初公布業績，相信表現唔錯，若然返內地掛牌一事真係報佳音，今年有望重登「紅底股」之列！

昨日阿莊提及手持嘅福山能源（00639），最高去過6.1元，收報5.97元，升1.19%，成交達到3.76億元，原來該股獲大摩唱好，評級為「增持」，目標價6.8元。阿莊都係咁講，呢轉企穩6元樓上可繼續持有，否則就唔好再心軟，會多睇一陣再作決定。

另一隻手持嘅股份上實城開（00563）亦見異動，曾升上3.45元，收報3.4元，升4.6%，成交2,507萬元，經已係連續四日以陽燭收市，昨日升至接近50日線（3.44元）。公司最近獲大股東上實（00363）授予10億元無抵押計息貸款，足見新主財力雄厚，並對公司財政給予有力支持，故阿莊依然睇好呢隻股，相信待內房股嘅政策陰霾消除後，此股必成內房板塊明日之星！

早前提到，收租股表現強勢，近日見到資金開始冷敲大折讓股，前日香港興業（00480）急升逾兩成，昨日未見有大幅回吐，平收5.25元；另外，同樣可炒收窄折讓概念嘅永泰地產（00369）、興勝創建（00896）及力寶華潤（00156）股價亦見異動。力寶華潤算係較有鑊氣嘅一隻，股價連續兩日現大陽燭，即日小注跟炒亦未嘗不可。

保健產品需求上升

再睇番大價嘅股份，基金股瑞年國際（02010）去年經過多次批盪後，股價由去年十月高位7.96元，反覆回落至上月低位5.24元才止跌回穩，見到公司大股東入場增持，其後股價整固咗大半個月，昨日終於靜極思動，一口氣踢上全日高位5.99元，收報5.94元，升8.39%，成交1,395萬股，乃去年十一月上旬以來最大嘅單日成交股數。

瑞年主要從事產銷營養保健品及藥品，隨着內地居民收入增加，對保健產品需求上升，公司嘅業務定位備受基金睇好。以現價計，今年預測市盈率約十五倍，排除不可臆測嘅風險，照計喺消化咗批盪引發嘅沽壓後，有條件再翻炒。若然這幾日做支小旗仔，可以趁調整細細注玩吓，確認衝穿6元關嘅話，上望6.8元，10日線支持位5.4元。

戰報

阿莊在上月二十三日指恒鼎實業股價可博反彈，推介當日低位6.34元，昨日高位7.6元，最多升逾19%。

志強在上周二建議留意翻炒JOYCE的機會，昨日終於起動，高位見0.96元，收報0.94元，最多曾升逾12%。