中銀溫兆華客串做教授
好多學府都喺財金界搵猛人任教，太子聽講中銀國際董事總經理兼槓桿及結構融資部主管溫兆華（Wilson），早兩個月前正式接受咗中大財務學系委任做客座教授，佢話之前搵過中大學生幫手，研究市場上嘅槓桿財務有咩變化，依家就返去教書，太子覺得佢都算投桃報李咯。
執教中大MBA課程
今次喺中大財務學系教書，Wilson會教足三年，主要係教工商管理MBA碩士課程，但依家未有正式課程，只係間中去講吓課，仲話未來會帶學生研究吓唔同課題，喺唔同部門做研究。
Wilson話，喺大學教書，可以認識一班年輕人同佢哋嘅諗法，佢哋未來又可能會係大公司嘅骨幹，甚至係自己公司同事，各方面都有得益，諗番自己經過一段時間先成長，都希望幫到其他成長嘅人。Wilson呢種春風化雨嘅心態，唔做老師就真係浪費啦。第日Wilson返工，除咗見同事，仲可能見到自己桃李滿門添。