太子手記：高盛食住上幫fb搵大客

Facebook（Fb）早期嘅投資者帳面已賺到盆滿缽滿，FB將來就係投資銀行家口中嘅肥肉，據聞高盛入股Fb後，仲想推介賣畀班老主顧，Fb嘅財務總監David Ebersman仲幫埋拖，教高盛點樣推銷，賣得好價大家都有着數。

高盛近日夥拍俄羅斯私募基金DST入股社交網站FB嘅消息曝光，更傳出計劃成立特殊目的公司（SPV），招攬一班私人銀行貴客齊齊入股Fb，額外集資15億美元。

市場仲傳出，高盛請Fb財務總監David Ebersman為旗下私人銀行部門嘅賓架補習，以視像同電話方式教佢哋向上咗年紀嘅客戶解釋FB呢個網站嘅運作，等佢哋互相了解多啲。

行內估計高盛咁認真，除咗因為私人銀行客戶普遍年紀較大，需要指導吓班賓架點推銷，更重要係高盛想做場好戲，等Fb管理層見識到佢哋集資有幾叻，為將來首次公開招股揀保薦人嘅選秀會鋪路，盡早攞分咁話。

做成IPO 保薦費和味

Fb估值升到500億美元，IPO保薦包銷費用都幾億美元啦！Fb會唔會上市要睇創辦人朱克伯格，Fb股價喺私人交易所不斷咁升，已經帶挈咗好多投資者，好似長實（00001）主席李嘉誠投資咗1億美元喺Fb，依家已升值好多。