市場徐想：低息環境 港股受惠
踏入二○一一年，祝各粉絲炒股炒贏市。雖然美股不斷「再與天比高」，但係基本經濟因素都喺度慢慢好轉中，甚至會比股市行慢半年，美元就更加難翻身變強，咁樣低息環境喺二○一一年持續下，「暖流」自然流入新興市場，當然唔少得亞洲市場，港股自然又可以受惠唔少，正！
雖然政府上年「左一招，右一招」嚟打擊炒家，令樓市回調，但過咗成個月，交投水平又重返到出招前。同九七年高峰期比，港人嘅供樓負擔比率只係高峰期嘅一半。供應斷層問題短期難以改善，加上人仔上升加強咗班子民嘅入市意欲，所以中期仍然樂觀。
「十二五」推出第一年，對唔同嘅板塊都係進行巨額投資同埋補貼，行業購併重組，龍頭股梗係受惠。喺咁嘅形勢之下，炒股唔炒市絕對係上上策，通訊設備板塊、內地服裝零售、百貨股都要留意，所以由今日起，向呢幾個板塊追蹤。